307/2025-2026

Khawzawl, dated 24th April 2025: Vawiin chawhma dar 1 khan DC Meeting Hall-ah fur lo hnai tura chhiatrupna thleng thei laka invenhim dan sawiho turin District Disaster Management Authority (DDMA) an thukhawm a, Khawzawl DC leh DDMA Chairman ni bawk Pu K. Vanlalthiana chuan a kaihruai.

He hunah hian DDMA chuan Disaster Emergency Operation Centre (DEOC) hi nitin kartluanin (24x7) thawk se tih an rel a, biak theih rengna tur phone leh phone number hran awm se tih rel a ni bawk. VC te'n luikawr te lo tifaia tui tling thei laka inveng turin hrilh ni se tiin an rel a, chhiatrupna thleng thei laka invenhim dan tur mumal leh hmun hlauhawm bik, chhiatna thlen ngunna bik te chiang taka hriat a nih theih nan Zonal Officer te kaihhruainain Village Disaster Management Plan (VDMP) siam ni se tiin an rel bawk. Line department te'n thil tulah biak theih bik tur (contact person) awm se tih an rel a, heng thurel te a that leh that loh finfiah nan leh enchhin nan mock drill buatsaih ni se tiin an rel bawk. Heng bakah hian hmanrua endikna neih te, inhrilhhriatna zau zawk neih dan te, District Disaster Management Plan (DDMP) siamthat te leh tul dang tam tak an rel a ni. Chairman Pu K. Vanlalthiana chuan tluang taka sawihona an neih theih avangin member te hnenah lawmthu a sawi a, chhiatna thleng thei laka inring reng turin a fuih bawk a ni.

He hunah hian DDMA member te kim takin an tel thei a ni.