1748/2022-2023

Khawzawl, the 29th August, 2022 : Khawzawl District Education Committee leh Teacher's Day Celebration Committee chu vawiin khan Khawzawl DC Conference Hall-ah an Chairman Pu C.C.Lalchhuangkima, Deputy Commissioner hovin an thukhawm.

He hunah hian Pu C.C.Lalchhuangkima chuan Covid-19 hri lengin a nghawng ber chu zirna a ni a, naupangin an zirna kawngah nasa takin an tuar a, ngai awh leh turin bul tan chhoh leh mek a ni a, zirtirtute pawhin tan an lak a tul hle a ni, a ti. District Bawhsap chuan ruihhloin min tuam nasat avangin zirlai naupangte hi eng angin nge ruihhlo hian a run tih hriat a ni loh avangin zirlai naupang zingah ruihhlo that loh zia sawi tam a pawimawh  tak zet tih a sawi bawk.

Meeting-ah hian DEO Pi K.Lalsiamliani chuan power point presentation hmangin Samagra Shiksha hnuaia hmalakna hrang hrang report a pe a. Report atanga a lan danin, Khawzawl district chhung khaw 38-ah Sorkar School leh Private school 133 a awm a, Primary leh Middle School zirlai hi Govt School leh Govt Aided School bikah zirlai 3568 an awm a, Private School bik - Primary leh Middle School-ah zirlai 4044 an awm thung a ni. High School leh Higher Secondary School zirlai hi Govt School leh Govt Aided School-ah zirlai 1482 awmin Private High School leh Higher Secondary School-ah 471 an awm bawk a ni. Primary School (Govt & Samagra)-a zirlai 40 leh Middle School (Govt & Samagra) 36-a zirlai 3211 te hnenah zirlaibu a thlawna sem a ni a, PM POSHAN (Mid-day meal) pawh Elementary School 77, Primary School 40 leh Middle School 37-ah sem a ni a. Khawzawl district chhunga sorkar School 86-ah tui thianghlim pek a ni tawh a, Middle School chin chung lam School 35 Sanitary Pad Vending Machine & Incinator pek a ni bawk.

Heng bakah hian kumin January thla khan School kal rual School kal lo dapchhuah hna YMA te nen thawh niin hmeichhia 8 leh mipa 9 hmuh an ni a, hmeichhia hi Non Residential Special Training Centre (NRSTC)-ah enkawl an ni a, mipa 9 hi Residential Special Training Centre (RSTC-Boys Hostel)-ah enkawl an ni bawk. Vocational Education pawh Khawzawl District chhungah Govt. High School Khawzawl leh Govt. Mizo High School Khawhaiah kalpui niin, Govt. High School Khawzawlah 'Automotive' leh Apparel (Sewing Machine Operator) zirna kalpui niin, Govt Mizo High School Khawhaiah Agriculture leh IT & ITES zirna kalpui mek a ni bawk.

Vawiin vek khan Teacher's Day Celebration Committee, Khawzawl District chu Bawrhsap Pu C.C. Lalchhuangkima hovin Zirtirtute Ni, Teacher's Day hman dan tur relin an thukhawm a. Thukhawm chuan Teacher's Day 2022 lo thleng tur chu School tinin mahni remchan dan angin mahni school theuhah hman mai nise an ti a. School tinah Teacher's Day Banner tar nise an tih bakah Teacher's Day Photo Boot buatsaih ni se an ti a, Khawzawl khawpui chhung hmun remchang laiah banner tar ni se, an ti bawk. Heng bakah hian TV,  Chanchinbu leh Social Media lamah Teacher's Day puala Deputy Commissioner thuchah tih chhuah nise an ti bawk.