1095/2026-2027

Dated Khawzawl, the 19th June, 2026 : Vawiin khan Khawzawl District Mineral Foundation (DMF) Governing Council chu Addl. DC Pu K. Zorammuana kaihhruaiin DC Conference Hall-ah an thukhawm.

DMF Governing Council thutkhawmah hian Directorate of Geology & Mining atangin Sr. Geologist Pu Malsawmdawngliana leh Geologist Pu V. Lalbiakmawia te an tel a. Pu Malsawmdawngliana chuan powerpoint presentation pein, District Mineral Foundation (DMF) din a nih chhan leh a kalphung tlangpui a sawi a. DMF-a mining-titute hnen atanga royalty leh fine lut thin sum tlingkhawm hi Pradhan Mantri Khanij Kshetra Kalyan Yojana (PMKKKY) scheme hnuaiah ram hmasawn nan leh mipuite tan tangkai taka hman tur niin, he scheme hnuaia hmalaknate hi DISHA-in a endik thin a ni.

Khawzawl district-ah October 2023 – April 2026 chhung khan DMF Fund-a sum lut hi Rs.1,69,711/- a ni a. He thutkhawmah hian sum tlingkhawm hman dan tur sawiho niin, Khawzawla Child Care Centre pathum Little Woods Girls Home, Exodus Boys Home leh Khawzawl Observation Home-ahte RO water filter dah nise tia rel a ni a. Khawzawl Sub-centre hnuaia Hmuncheng Health Clinic-a bungrawh mamawh hrang hrang lei ni se tih a ni bawk.

Village Council hruaitute chu an bial chhunga quarry neite permit dinhmun lo hrechiang turin leh mining permit neite hnenah royalty pek that a pawimawh zia hrilhhriatna awareness-te neihpui nise tih a ni a. Mining ti tur hian permit neih ngei a ngaih thu pawh in hrilhhriat thar leh nise tih a ni bawk.