1096/2026-2027

Lunglei, 2026 Nikir thla ni 20: Vawiin khan Mizoram sawrkara Urban Development & Poverty Alleviation (UD&PA) Minister Pu K. Sapdanga chuan Lunglei Circuit House Conference Hall-ah Lungleia thu thar theh darhtu, Mizoram Journalists' Association (MJA), Lunglei District member-te kawmin, thingpui a inpui.

Minister hi Adviser to Chief Minister (Political) Pu Lalmuanpuia Punte, MLA bakah, UD&PA Commissioner & Secretary Pu K. Lalthawmmawia leh Director Pu Jacob Lalawmpuia te'n an ṭawiawm a. MJA Lunglei District hi an President Pu H. Lalthansanga'n hovin, Lunglei khawpui hmasawnna tur hma lakna leh hmachhawp hrang hrang an sawi ho.

UD&PA Minister Pu K. Sapdanga chuan tun ṭuma Lunglei an tlawh chu tum bik nei leh thu lawmawm kenga kal an nih thu sawiin, Lunglei Municipal Council (LMC)-in Lunglei mipuite tana hna a thawhna kawngah hun rei tak hna thawk hlei thei lova a awm hnuah UD&PA Secretariat leh Directorate te nen an harsatna chin fel dan tur uluk taka ngaihtuahin, a ṭul anga an mamawh ngaihtuahsak turin Lungleiah chuan an thawk phei tih a sawi a. Lunglei hmasawnna tura hma lak dan turah LMC hotute leh Lungleia MLA-te nen rilru inhmu taka thil an rel ho thu leh lawmawm an tih thu a sawi.

Minister Pu K. Sapdanga chuan Lunglei khawpui tana UD&PA-in a ruahman hmasawnna project lian zual tar langin, State Priority Project (SPP) hnuaiah cheng nuai 1,750 hu project lian 5 kalpui mek a awm thu a sawi a. Cheng nuai 400 senga Sazaikawna LMC Complex dinna turah ram lei tura biak fel tawh a man pe hlei thei lova kum hnih a awm hnuah tunah ram leina tur sum funa an thawh phei thu leh vawiinah inhlan a nih tur thu sawiin, ram man an pe tlak thei ta chu lawmawm an tih thu a sawi a. LMC Complex sa tur hian contractor thlan fel a nih tawh thu leh hna an ṭan nghal theih dawn thu a sawi.

Minister chuan SPP hnuaiah hian cheng nuai 350 senga lirthei lian leh te din khawmna tur Transport Hub sakna turin Theiriatah mimal ram lei a nih thu leh a man pek tlakna tur tunah an rawn fun phei thu sawiin, contractor thlan fel tawh a nih thu leh a rem veleh an bun ṭan theih dawn thu a sawi a. Cheng nuai 200 senga Ramthar AOC Market Shed sakna tur pawh buaipui mek a nih thu sawiin, cheng nuai 300 senga C. Ṭhuamluaia Mual bula lirthei dahna Multi-Level Car Parking sak hna chu contractor-te'n an thawh mawp mawp tawh thu leh a hmun an laih zawh lek lek tawh thu a sawi a. Saikuti Hall chei ṭhatna turin cheng nuai 500 dah a nih thu leh dawhsan (stage), ṭhutna, lighting & sound, a chung leh thil hrang hrang thlak ngai thlak leh siam ṭhat tur a nih thu sawiin, a rang thei ang bera hna ṭan tum a nih tur thu a sawi.

Minister chuan Urban Infrastructure Development Fund (UIDF 2025–2026) hnuaiah Lunglei khawpui tan cheng nuai 525 dah a nih thu sawiin, Lunglei Park chei ṭhat nan cheng nuai 200 dah a nih thu leh khaw ṭhat veleh contractor-te'n hna an ṭan nghal tur thu a sawi a. Khawlaia vantlang inthiarna in (pay and use toilet) set 1 cheng nuai 25 zelin hmun 4-ah cheng nuai 100 senga siam tura ruahman a nih thu leh bul ṭan theih thuai beisei a nih thu sawiin, a enkawl nan inthiar man erawh a awm a ngai dawn tih a sawi a. Khawpui chhunga kea kalte veivahna footpath chei ṭhat nan cheng nuai 225 dah a nih thu leh khuain a zir chuan thawh ṭan theih thuai beisei a nih thu a sawi.

Minister chuan SASCI Part-XB hnuaiah Lunglei khawpui chhung hmasawnna hna hrang hrang 80 thawhna tur cheng nuai 200 dah a nih thu sawiin, Municipal te enkawl chhunzawm tur a nih thu a sawi a. Councillor-te'n an ward ṭheuhva thawh dan tur an siam fel tawh thu leh hna ṭan theih thuai beisei a nih thu a sawi.

Minister chuan SASCI Part-V aṭangin damdawi in bawlhhlawh, mipui tana hmuh hrehawm leh him lote tihralna tur leh damdawi in chhung hmanrua tihral leh sawngbawlna turin Theriatah Common Bio-Medical Waste Treatment Facility din tum a nih thu sawiin, ram neih fel a nih tawh thu leh a sak nan hian cheng nuai 1,400 ruahman a nih thu a sawi a. Chhim District pali dawl zo tura ruahmanna siam a nih thu leh tender tura lehkha pawimawh buatsaih mek a nih thu a sawi.

Minister chuan SASCI Part-XIII hnuaiah kawr lian hlauhawm siam thei leh a muala tawlh ṭhin tihdamna leh venna tur storm drain siam nan cheng vaibelchhe 10 ruahman a nih thu leh Lungleiah cheng nuai 250 dah a nih thu a sawi a. UD&PA aṭanga Lunglei khawpui tihhmasawnna leh chei mawina atana hmin sa hna thawh mai tur tun ṭuma an rawn feh chhuahpui chu a zavaiin cheng nuai 5,387 hu a nih thu a sawi.

UD&PA Minister Pu K. Sapdanga chuan Lunglei khawpui tana UD&PA project zawng zawng chu rulh leh ngai chi a awm vak lo tih sawiin, project tam zawk chu sum hnar awm tur a nih zawk thu a sawi a. Lunglei khawpui enkawlna atana sum tuakna tur project deuh vek a nih avangin a phurawmin a lawmawm tak zet tiin, UD&PA leh LMC hotute an lawm ang bawkin Lunglei mipuite pawh an hlim ve hle a beisei thu a sawi.

He hunah hian MJA member-te'n sawrkar hma lakna hrang hrang hriat duh an neihte chu Minister hi zawtin, rawtna leh mamawh an neihte Minister hnenah hian an thlen bawk a. Minister chuan an zawhnate chhangin, an rawtna leh mamawhte chu chhinchhiah a, a ṭul anga an en zui tur thu a sawi.