555/2025-2026

Khawzawl, dated 23rd May 2025: Vawiin chawhnu dar 3 khan Khawzawl DC Auditorium-ah MJA General Headquarters President, Pu C. Lalrambuatsaiha'n Khawzawl MJA a hawng.

Pu C. Lalrambuatsaiha chuan, KhawzawI District MJA hnawn a ni ta chu MJA bakah Khawzawl District tan thil chhinchhiahtlak tak a nih thu a sawi. Chanchinbu mite chu Sorkar kutke pawimawh tak a ni a, sorkar chu langtlang taka a kal a, dik taka ro a rel theih nan chanchinbu mite chu hmanraw tangkai tak an nih angin Sorkar pawhin a theihna zawn zawnah a duhsak thin a. Hetihrual hian chanchinbu mite chu Sorkar thu thuin an awm tihna a ni lo a, Sorkar kalphunga thil fel tawk lo leh dik tawk lo awm puanzar kawngah an tim mai tur a ni lo a, thil dik lo awm chu huaisen takin an puang chhuak thin tur a nih thu a sawi. Pu C. Lalrambuatsaiha hian Khawzawl District MJA indan nan MJA General Headquarters hmingin Rs. 20,000 a hlan nghal a ni.

Khawzawl DC Pu K. Vanlalṭhiana chuan thu sawiin Khawzawl District MJA hawn a ni ta chu lawmawm a tih thu a sawi a. Chanchinbu mite chu mipui rilru sukthlek kaihruaitu an nih angin an thu chhuah turah ngaihtuahna fim tak hmang thin turin a chah a. Hetiang chiah hian mipuite pawh Social Media-a thu leng vakah innghat mai lova, thu lakna atan chanchinbu rintlak ngei chhiar nachang hre turin a chah a ni.

KhawzawI District MJA hawnna inkhawm hi MJA General Headquarters Vice President Pu C. Lalhmachhuana'n a kaihruai a, inkhawm hi Khawzawl DC Pu K. Vanlalṭhiana, Khawzawl SP Pu F. Lalbiakzauva, Khawzawl IPRO Pu Lalzara, KhawzawI District-a Department hrang hrang leh NGO aiawhten an hmanpui a. Aizawl atangin MJA General Headquarters President Pu C. Lalrambuatsaiha; Vice President Pu C. Lalhmachhuana; Treasurer Pu Lalrinmawia Sailo te, General Secretary K. Zothanpara; Secretary pathum - Pu Lalnunzira Chawngthu, H. Lalchhandama, Pu Samuel Lalruatsanga; President hlui Pu Vanlalrema Vantawl; Executive Member Pu Lalremsiama leh Pu F. Lalrinfela te bakah member pathum Pu Lal Rinmawia, Lalhmunzauva leh Lalrochhuanga Colney te an kal a. Champhai District MJA atangin Pu R. Lalfakzuala leh Lalhmingliana te an kal bawk.

Khawzawl District MJA hruaitu atan heng mite hi ruat an ni.

1. President - Pi Lalthlamuani Ralte
2. Vice President - Pu Lalrotluanga
3. Treasurer - Pu Rohmingthanga
4. Secretary -Tv. Vanlalzawna Ralte

Executive Members -
1. KC Ngurbiakzuala
2. Lalrinhlua Ralte