No.2283/2021-2022
Aizawl, the 20th September, 2021: Vawiin chawhma dar 11:00 khan Khawzawl District Water & Sanitation Committee (DWSC) chu an Chairman Pu C.C. Lalchhuangkima, Deputy Commissioner hovin DC Conference Hall-ah an thukhawm.

Khawzawl District Bawrhsap chuan nitin khawsaknaah faina chu thil pawimawh ber zinga mi a ni tih sawiin, faina tel lo changkanna chu faina famkim a ni ngai lo a ti a. India Independence Day vawi 75 na denchhena Azadi Ka Amrit Mahotsav (AKAM) hnuaia tihtur hrang hrang tarlan zingah faina beihpui thlak a tel chu thil remchang leh lawmawm tak a nih thu a sawi bawk.

Khawzawl District Water & Sanitation Committee meeting-ah hian Azadi Ka Amrit Mahotsav hnuaia ‘Faina Beihpui Thlak (Swachh Bharat Niwas)’ hman dan tur chungchang rel niin, Khawzawl District-a Rural Area huamchhung khaw hrang hrangte tan faina kawnga inelna buatsaih nise tih a ni a. Endik tur zingah School, Aganwadi, VC House/BNRGSK bakah vantlang hmunhma pawimawh leh langar zual- Community hall, vantlang inthiarna, Waiting shed leh a dangte a tel dawn a ni.

Meeting-ah hian District chhunga khuate faina kawnga an intihsiakna endik tur team 11 (sawmpakhat) pawh duan nghal niin, heng team 11 te hian uluk taka endikna an neih hnuah khaw fai lawmman dawngtute puanna leh lawmman semna hi October ni 9, 2021 ah neih tura ruahman a ni bawk.

Vawiina DWSC, Khawzawl District thukhawm chuan plastic hman nawn theih loh (Single use plastic) bansan chungchanga inzirtirna (awareness campaign) kalpui dan tur pawh sawihoin, hmalakna hmasa atan District chhunga khaw lian deuh deuhahte hemi chungchang inzirtirna banner engemawzat tar nise tiin a rel bawk.