4125/2024-2025

Khawzawl, dated 7th February 2025: Vawiin chawhma dar 10 khan DC Meeting Hall-ah Village Council inthlanpui 2025 atana ruat Election Observer Pi Melody Ngurthantluangi, Joint Director, Commerce & Industries hovin nodal officer te leh party mi te an thukhawm a, Khawzawl DC leh District Election Officer ni bawk Pu K. Vanlalthiana'n hun a kaihruai.

Chairman Pu K. Vanlalthiana chuan Election Officer Pu Timothy R. Lalhmangaiha, SDPO Pu C. Vaninmawia leh Addl. DC leh Dy. DEO ni bawk Pu Lalfakzuala te an inpuahchahna sawi lang turin a sawm a, inthlanpui atana pawimawh hrang hrang, Model Code of Conduct lamah te, polling station inpeih dan te, duty tura returning officer, booth level officer leh chanvo nei dang inpuahchahna te leh security lama hmalakna te an sawi hlawm a ni. Chumi zawh chuan Election Observer Pi Melody Ngurthantluangi chuan Khawzawl district inthlanpui atana an inbuatsaihna a hmuh dan hrang hrang a sawi a, an thil tih that te, tih that tawk lo leh hma sawn theih dan te leh a ngaihdan te a sawi. Chairman Pu K. Vanlalthiana chuan observer te, nodal officer te, party aiawha lo kal te leh MPF te an lo tel theih avangin lawmthu a sawi a, inthlanna felfai leh muanawm taka kalpui a nih ngei theih a beisei thu a sawi a ni. Thlen duh nei apiang tan hotute, nodal officer te emaw election officer te hnena thlen turin a chah bawk a ni.

He hunah hian SDO (Sadar), SDC, DIPRO, party aiawh te leh YMA aiawh te an rawn tel a ni.