4126/2024-2025

Lawngtlai, 7th February 2025 : Vawiin dar 12:00 khan Lawngtlai District Level Committee on Fire Prevention chuan ' Fire Prevention Week 2025' hman dan tur rela thutkhawm DC Conference Hall- ah an nei a. Pu Zoramsiama Hmar, Addl. DC chuan thutkhawm hi a kaihruai.

Pu Zoramsiama Hmar chuan kangmei chhuakin   chenna In  bakah nunna hial a lak fo thin avangin kangmei chhuak lo tura hmalak a tul hle a ti a. Sawrkar pawhin theihtawp chhuahin, State leh District Level ah Committe a din hial a ni tiin, he Committee kaltlanga chak taka hmalak a nih thu a sawi. Addl. DC chuan kangmei chhuakin ramngaw nasa taka tichereuin, ramsate chenna tihchhiat a nih bakah tam takin nunna an chan thin a, a pawi hle a ni, a ti.  Pu Zoramsiama Hmar chuan District Level Committee on Fire Prevention - te chu Lawngtlai district chhunga kangmei chhuak lo tura theihtawp chhuah tura chahin, VC, NGO leh mipuite pawh kangmei laka fihlim tura thawhpuiah  a  sawm nghal bawk.

Pu K. Lalromawia, DCCF (LADC) leh Member Secretary, Lawngtlai District Level Committee on Fire Prevention chuan report tawi pekna neiin, 'Fire Prevention Week 2025' hman dan tur sawihona neih nghal a ni a. Fire Prevention Week - hawnna hi   February ni 10, zing dar 11:30 ah DC Conference Hall- ah neih ni se, khuallian atan Dr. Lorrain Lalpekliana Chinzah, MLA ( Adviser to Chief Minister) leh Chairman atan Pi Margaret J. Vanalremmawii, SDO (S) te ruat an ni a. Fire Prevention Week 2025 - puala thu intiamkamna  kaihruai turin Pu K. Lalromawia, DCCF (LADC) ruat a ni.

Kangmei laka invenna leh kangmei chhuak lo tura fimkhur inzirtirna 'Awareness Campaign' khaw hrang hrang leh Refugee Camp- a  kalpui bakah Kohhran zawng zawngah lehkha pek ni se an ti a.  Lawngtlai Village Council Association leh CYLA hnenah ngenna siam ni se, Hoarding pawh a tam thei ang ber tar ni bawk se an ti a.  Village Level Fire Prevention Award 2025-  buatsaih ni se tih niin, lawmman atan Pa khatna - Rs. 50,000; Pa hnihna - Rs. 30,000 ; Pa thumna - Rs. 20,000 leh Certificate hlan ni se, Appreciation Certificate-  siam ni bawk se an ti a. Lo/ Leipui hal theih hun chhung atan March ni 15 thleng ni se an ti bawk.

Fire Prevention Week -hi kum tinin thupui thlan bik nei a hman thin a ni a, Kumin thupui atan ' Kangmei ven hi kan tu leh fate hmakhua tan a ni'  tih thlan a ni a. Lawngtlaiah chuan February ni 10- 15 chhung hman a ni ang.

Vawiin thutkhawmah hian 'Lawngtlai District Level Committee on Fire Prevention'  Member- te an tel kim tha hle a, Pu Zoramsiama Hmar chuan lawm thu sawina neiin hun a khar.