262/2023-2024

Khawzawl, the 28th April, 2023: Vawiin  chawhma dar 11:00 khan Khawzawl Power Division buatsaihin Govt. Khawzawl College Multipurpose Hall-ah Electrical Safety Day, 2023 pualin hun hman a ni.

He hunah hian khuallian Khawzawl Joint VC Chairman Pu K.Vanlalsiama chuan thu sawiin, Electric Department chu mipui nena inngheng ber department zing ami an ni a, an hna hi thih leh dam inkar a ni ber a, office hour bakah pawh hna an thawk nasa hle a, mipui tana hma an lakna hi fakawm hle a ni a ti. Mipuite'n an hna thawh dan hi kan hriat chian pui lo thin hle a, electric a thim changin kan sawisel mai thin a, hengtiang hunah pawh hian power department chuan dawh thei taka hna an thawk thin chu fakawm a tih thu a sawi bawk a ni. Electric department-te'n tlaivar dawn dawna hna an thawh te, chaw pawh ei mumal lova hna an thawh chang a tam tih mipuite pawhin an hriat a tul thu a sawi lang bawk. Khuallian chuan District leh khawtlang mipui tana hna thawh kawngah Electric Department chu an thawhhopui theih reng thu te, thawhhona tha tak neih a tul thute a sawi lang bawk a ni.

He hunah hian Er. Ng Lalruatsanga, EE, Khawzawl Power Division chuan Electric hman kawnga fimkhurna tur kawng hrang hrangte power point presentation hmangin zirtirna a pe a. Er. Ng Lalruatsanga chuan electric hman kawngah mipuite fimkhur a pawimawh tih sawiin, mihring thihna hi Volt tlemte chauh a nih thu te, current kal sual tia kan sawi fo thin chu thil dik lo a ni a, electric current hi a kalna tur dik takah lo chuan a kal lova, a hmangtu mipuite kan fimkhur a ngai zawk a ni tih a sawi bawk.

He hunah hian Govt. Khawzawl College zirlaite leh Khawzawl Higher Secondary School zirlaite leh zirtirtute bakah Khawzawl P&E Department Staff-te an tel a ni.