Tun thla ni 2 atanga hman tan, Cleanliness Week chu vawiin khan Khawzawlah khar a ni a, vawiin chawhma dar 11:00 khan Zaingen YMA Hall-ah Faina Hapta kharna inkhawm hi buatsaih a ni a, hetah hian faina hapta hman chhunga faina lama inelna buatsaih a ti tha te hnenah lawmman sem chhuah a ni.

Vawiina Faina Hapta kharna inkhawm buatsaih hi SDO Sadar Pi S.T. Lalvensangi'n a kaihruai a, Khawzawl District Bawrhsap Pu H. Lianzela chu khuallian niin S.P. Pu PC. Lalchunglura chu khualzahawm a ni. Khuallian D.C. chuan thu sawiin, kum 1977 atangin Mizoram Cleanliness Week hman chhunga faina lam inelna hlawhtling taka buatsaih a ni chu lawmawm a tih thu leh hemi ti thei tura a kaihhnawih hrang hrang te inpekna ropui a tih thu a sawi a. Kum 2014 atangin Swacch Bharat Mission bultan anih atangin India ramah faina lamah nasa takin hmalak a ni a, he hmalak hlawhtlinna hi Khawzawl mipuite pawhin a takin kan hmu ta chu lawmawm a tih thu a sawi a. India Hnampa Pu Gandhi-a piancham vawi 150-na lawmna tun thla ni 2 a Aizawl Vanapa Hall a neih a khawpui fai lawmman semnaah Category 2-ah Khawzawl 7-na a ni leh Mizoram khawpui 23, Qualified Town zingah a pumpuiah 13-na Khawzawl a ni phak te chu lawmawm a tih thu a sawi bawk.

SP PC. Lalchunglura pawhin thu sawiin, Pathian in a mi leh sa a enkawl bik a te chu fai turin a zirtir nasa a, Mosia lehkhabu 4 te han en chuan faina chi hrang hrang a zirtirna hmun tam takah kan hmu a, chu chuan fai pawimawhzia a tilang a ni a ti a. Kristian leh faina hi a inhmeh bik a ni a ti a, faina hi hriselna, damreina, hlimna, changkanna, hausakna a ni tiin khawvel a kan awm chhunga kan thil tih leh kan awm dan zawng zawng innghahna bul ber a ni a ti a. Faina hi thil pawimawh ber a ni lo thei lo tiin faina ngai pawimawh turin vawiina kalkhawmte chu a chah a ni.

Vawiina faina hapta kharna inkhawmah hian Faina hapta puala Essay Writing Competition, Slogan  Writing Competition, School fai inelna, Hotel/Restaurant/Tea Stall fai inelna, Office fai inelna, veng fai inelna leh Extempore Speech Competition buatsaih a ti tha te hnenah lawmman semna neih nghal a ni.