Vawiin chawhnu hian Serchhip Auditorium ah Serchhip Town Sanitation Task Force huaihawtin Khawpui Fai Inelna 2019 a district khawpui fai ber an nihna te, overall category a pathumna an nihna te lawmna leh Faina Hapta 2019 kharna hun an hmang a. Bawrhsap Pi Sangchhin Chinzah chu khuallian a ni. 

Pi Sangchhin Chinzah chuan, district khawpui fai ber kan nih theih nana theihtawp chhuahtu Serchhip mipuite zawng zawng chungah lawmthu sawiin, he lawmman kan dawn theihna bul chu mi pahnih khat thahnem ngai fal te vang nilovin, mipui zawng zawngten thukhat vuaa fai kan tum vang a ni, a ti. Vawiina pakhatna lawmten nakkumah pakhatna kan chelh zui lovang tih hlauva a aia nasa zawka bei turin a fuih a, nakkumah pawh pakhatna nih zui zel kan tumin kan inbuatsaih sauh sauh tur a ni, tiin kalkhawm mipuite a fuih a. Kan thinlungin faina a duh takzet chuan kan taksain chu kawng chu a zawh mai a ni, a ti. Fai pawimawh zia sawrkarin a hriat avangin Faina inzirtir uar hapta a siam thin a, vawiinah chu hapta kharna hun chu neih mah ila, faina lama hmalakna chu nasa zawkin kan bei chho zel dawn nia, tiin nasa zawka hmalak zel tul a tih thu a sawi a ni. Khuallian hian Faina Hapta puala YMA chhang intihsiaknaa lawmman late hnenah lawmman a sem nghal a. Pakhatna hi Hmar Veng YMA Chhang niin pahnihna chu Chhimveng YMA Chhang an ni a, pathumna chu Chhiahtlang Chanmary YMA Chhang te an ni. 

He inkhawm ah hian Serchhip Town Sanitation Task Force chuan Pu Lalduhawma chawimawina a neia, Pu Lalduhawma hi tun hmaa Zoram dung leh vangin One Man Band-a tia an hriat lar thin kha a ni. Ani hian lawmman leh thilpek engmah phut nei lovin kum tam tak Serchhip Bazar leh a chhehvel te hi a lo phiat fai tawh thin a, zing khawvar tirh atanga tlai thim thlengin a thawk ngauh ngauh thin a ni. Kum dangah pawh ani hnenah hian thilpek hlan a lo ni tawh thin a, vawiinah pawh a bikin Sanitation Task Force hian Rs. 5000 a hlan leh a, Tin, Thupui Sawina (Whatsapp) Group ten thawhkhawmin Pu Lalduhawma hi Rs. 21,500 an hlan ve bawk a, Serchhip Village Council IV ten Citation leh Rs. 5000 an hlan bawk a ni. 

Inkhawm hi Pu K. Saitluanga, DIPRO Serchhip chuan a kaihruaia, Pi Vanthangpuii, DUDO in Serchhip khawpuiin lawmman a dawn theih nana hmalak dan tlangpui report pein he inelnaah hian Full Mark 100 ah Serchhip chuan Mark 88 a hmuh thu a tarlang a, kumina hmalaknaah a bik takin YMA Chhang leh zirlai naupang lamin tha an thawh nasat thusawiin, YMA chhang leh zirlai naupang nasa zawka thawhpui an nih chhan pawh nakin zela kan fate thinlunga faina tuhngheh tumna pakhat a nih thute a sawi a. Hmalakna hrang hrang tarlanna video te pawh thlirho nghal a ni. 

He hunah hian Serchhip Town Village Council aiawhte, District Hqtrs MUP leh MHIP ten thusawina hun an hmang a, kal khawmte awiin Sub Hqtrs YMA Cultural Troup te, Serchhip Artist Group Female Voice te, Er. F. Sanglura te, Vanlalhminghlupuii te leh Kimkima ten kal khawmte an awi a. Pu R. Sanghmingthanga, President, Sub Hqtrs YMA chuan lawmthu sawiin hun a khar a ni.