3560/2022-2023
Champhai, the 13th February, 2023: Vawiin chawhma dar 11 khan Khawzawl District Bawrhsap Pu C.C. Lalchhuangkima hovin District chhunga Fair Price Shop sakna tur chungchanga hmalak dan turte DC Conference Hall-ah an sawiho a ni. He hunah hian Khawzawl District chhunga VCP te an tel a ni.

Bawrhsap Pu C.C. Lalchhuangkima chuan Khawzawl District chhunga VCP leh an aiawh kalkhawmte lawmna thu sawiin, Fair Price Shop fai leh mipuite tana awlsam taka service pek theihna tha chu khawvel changkang zela  mamawh a nih thu a sawi a. Meeting koh chhan sawifiahin, Sawrkar laipui hmalaknain Fair Price Shop (FPS) te tih changkan leh hmasawn tuma ruahmanna siam a ni, a ti a. Mizorama Fair Price Shop-te chu hmun nghet nei lovin an awm a, retailer neitute an inthlak apiangin an awmna an sawn a ngai fo thin a, hei hian Fair Price Shop dawrtu mipuite tan kawng tam takah harsatna a siam a, buhfai thianghlimna pawhin a tawrh phah fo thin a ni, a ti bawk.

He hunah hian Fair Price Shop awmna tura  hmun nghet neih a nih theihna turin hun rei tak ngaihtuahna sen a lo nih tawh thu ngaihthlak a ni a. Pu Ashwini Kumar Choubey, Hon’ble Union Minister of State, Ministry of Consumer Affairs, Food & Public Distribution-in Mizoram a rawn tlawh (21st to 23rd Nov 2022) tum khan Central Warehousing Corporation (CWC) hnen atangin Fair Price Shop sakna tura tanpui an inhuam thu leh chumi atan chuan ram ruak (vantlang ram, lei ngai lo tur) mamawh a nih thu hriat a ni a. Hemi bawhzuina kalzela hmalak dan tur ngaihtuahtu vawiina thukhawm chuan ram ruak nei thei khuate chu DC Office-ah inhriattir thuai a ngaih tur thu tarlan a ni bawk.

Kalkhawmte atangin an khua theuhah Fair Price Shop sakna turin ram ruak an neih leh neih lohte ngaihthlak niin, ram ruak nei ten a zau zawngte leh thil tul dangte an tarlang bawk a. Hun tiam ral hma ngeiin VC zawng zawng ten an ram neih zau zawng mumal taka tehchhuakin a thlalakte nen DC Office-ah thehlut se tih a ni a. Hemi bawhzuina tur hian DC atangin lehkha pek chhuah nise tih a ni bawk.

Attachment

  • Loading attachment...