238/2025-2026

Khawzawl, dated 21st April 2025: Vawiin chawhnu dar 1:30 khan Mualvawm Field, Khawzawlah District Education Office leh Mizoram State AIDS Control Society (MSACS) bultumin ruihtheih thil leh mipat hmeichhiat hman khawloh laka fihlim tura inzirtirna atan Festival Sports on Drug Abuse, Safe Sex, HIV/AIDS and STI Khawzawl District huaihawt a ni a, Khawzawl DC Pu K. Vanlalthiana chuan khuallian niin sports festival hi a hawng a ni. He hunah hian zirlai naupang te leh kalkhawm te'n invawng thianghlim tura rinna thutiam (pledge) an la a ni.

Khuallian Pu K. Vanlalthiana chuan hetiang sports festival ropui tak buatsaih a nih avangin a buatsaihtute hnenah lawmthu a sawi a, HIV/AIDS leh STI laka inven nan ruihtheih thil leh mipat hmeichhiat hman khawlohna laka fihlim tlat turin naupang a fuih a ni. Hetiang sports inelna te hi inkhel thiam te chuan tuipuia mahni thiamna tihlan nan leh hmasawn nan chhawr tangkai zel turin a sawm a, naupang te hlim taka hun hmang tura duhsakna hlanin sports festival a hawng tih a puang a ni.

He hunah hian District Education Officer Pu JR Lalhruaitluanga chu chairman a ni a, Medical Officer Dr. Albert Lalhminghlua chuan HIV/AIDS chungchang, a nihna leh awmzia te, inkai chhawn theih dan te, invenhim dan te leh tul dang inhrilhhriatna hun a hmang. Ruihhlo laka fihlim tur leh invawng thianghlim tura rinna thutiam zirlai te'n an la a, Rebecca Zothanpuii, Miss Mizoram 2nd Runner Up chuan pledge taking a kaihruai a ni. Robert Lalthlamuana, Footballer leh Zirsangpuii, Miss Mizoram 2020 te chuan ruihhlo leh mipat hmeichhiat hman khawlohna laka fihlim turin naupang hnenah fuihna thuchah an sawi bawk. Hun khar nan Pu K. Thantluanga, Dy. DPC Samagra Shiksha chuan lawmthu sawina hun a hmang a ni.

Zirlaite rinna thutiam lak chu hetiang hi a ni:

"Ka taksa hi uluk leh thianghlim takin ka vawng ang. Mahni hriselna ka hlut tlat anga, Drugs hmansual thatlohna leh hlauhawmna hria in, ka chhungte leh thiante hnenah ka puangzar thin ang. Drugs hi kan ram leh hnam hmelma lian ber a ni tih hria in, ti ve miah lova thanglian zel turin ka in tiam e."

He hunah hian Khawzawl district-a sikul hrang hrang zirlai te leh zirtirtu te an kal khawm a, District Education Office thawktute an tel bawk a ni.

Festival Sports on Drug Abuse, Safe Sex, HIV/AIDS and STI hi vawiin April ni 21 atanga April ni 24 thleng atan duan a ni a, inelna hrang hrangah Khawzawl district-a high school leh higher secondary school te an tel kim vek dawn a ni.