No.5419/2020-2021

Dated Khawzawl, the 25th September, 2020: Deputy Commissioner's Office Khawzawl buatsaihin tukin khan Khawzawla infiammite tan Fit India Freedom Run neih a ni. He hunah hian Khawzawla Football, Volleyball leh Badminton Association atanga aiawh thlanchhuah theuhte an tela, an vaiin mi 46 an tlan a ni. District Bawrhsap Pu Zothanmawia chuan zing dar 6:30 ah fuihna thu sawiin tlan turte a vailiam a ni.

Fit India Freedom Run khuhhawnna Taidawnkawn, Zaingen Venga neihah Pu Zothanmawia chuan India chuan taksa leh rilru hriselna lamah hma a sawn zel thu sawiin, Mizo mipuiten nunphung leh ei leh in hriselna kan ngai pawimawh chho zel chu lawmawm a tih thu a sawi a. India ramah hemi kawnga hmahruaitu nihna chelh thei turin tan kan lak sauh sauh a pawimawh hle a ni, a ti bawk.

Fit India Freedom Run hi Taidawnkawn, Zaingen Veng atanga tanin, Hospital pêng, Hermon Veng thleng tlan a ni a, a thui zawng hi Kilometre 3.5 vel a ni. Tlan tawpna hmunah hian DC Office thawktute’n ei leh in an lo sem zel a ni.

Ruahman dan chuan naktuk September Ni 26, 2020 hian Khawzawla sawrkar department hrang hrang leh NGO aiawhte Fit India Freedom Run pualin an tlan dawn a. Taidawnkawn, Zaingen Veng atangin Additional DC Pu Lalrohlua chuan a vailiam ang a, 2nd IR Battalion Camp, Lungvar thleng tlan tur a ni ang.