491/2023-2024

Khawzawl, the 18th May, 2023: Vawiin chawhma dar 11:00 khan kumin Green Mizoram Day lo thleng tur, Khawzawl khawpui chhunga hman dan tur ngaihtuahin District Level Committee on Green Mizoram Day chu an Chairman, District Bawrhsap Pu K.Lalrohlua hovin Khawzawl DC Conference Hall-ah an thukhawm.

Meeting kaihruaitu District Bawrhsap Pu K.Lalrohlua chuan kumin Green Mizoram Day, June ni 11 chu Pathianni a nih vangin Mizoram Sawrkarin June ni 9, Zirtawpni-ah hmang zawk turin thutlukna a siam tih a sawi a. District Level Meeting kohah reng reng rokhawlhna lian tham a awm a nih loh chuan Department Head of Office-te chu tel ngei tura beisei an nih thu leh meeting neih dawnin report pek tur leh tul pawimawh dangte tha taka inruahmanlawk a pawimawh tih a sawi a. Khapna thupek prohibitory order tih chhuah chungchangah Department lamin order tih chhuah an duh a nih chuan order dinglai a awm em tihte an hriatchian hmasak a tul thu leh, order tih chhuah an duh chhante chiang taka an ziahlan a pawimawh thute sawiin, ataka bawhzui theih tur ngei order tih chhuah pawimawh a tih thu a sawi a. Thuthang nazawng awiha behchhan mai lova, mahni ngeiin finfiah zel a pawimawh thu a sawi bawk.

He hunah hian kum hmasa lama Green Mizoram Day lo hman tawh dante ngaihthlak hmasak a ni a. Green Mizoram Day puala thingphunna tur hmun hrang hrangte tun thla May ni 31 ralhmaa lo ruahman fel vek turin Environment, Forest & Climate Change Department, Khawzawl chu ruat a ni a. Green Mizoram Day hman ni, June ni 9 chawhma dar 10:00 ah Forest Complex-ah he ni pual programme hmangin hemi hnu hian Sawrkar Department hrang hrang leh tlawmngai pawlte kaltlanga thingphun hnatlang neih ni se tih a ni a. Green Mizoram Day kaltlang hian thing tiak lian sa 600 bawr vel phun ni se an ti bawk.

Vawiin meeting-ah hian Sawrkar Office hrang hrang aiawhte bakah tlawmngai pawl leh MJA aiawhte an tel a ni.