492/2023-2024

New Delhi, 18th May, 2023 : Ni hnih (May ni 18 & 19) awh tur National AYUSH Mission Conclave, Vigyan Bhavan, New Delhi a neih ah Health Minister Dr R. Lalthangliana telin a ni khatna vawiin khan thu a sawi a ni.

Vawiin a thusawiah hian Dr R. Lalthangliana chuan Mizoram State Medicinal Plants Board in National AYUSH Mission hnuaiah society 9 (chhungkaw 270) in hlawhtling taka hma an lak thu a sawi a. Chutihrualin kum 2020-2021atanga National AYUSH Mission hnuaia Medicinal Plants telh a ni ta lo chu pawi a tih thu sawiin, telh leh ngei turin sawrkar laipuia thuneitute a ngen a ni. Mizorama ramhmul damdawi te zirchian a tihchangtlun a nih theih nan North Lunglengah Herbal Garden din tum a nih thu a sawi bawk a ni.

Minister hian Mizoramah AYUSH daktawr mamawh belhna a nasat thu sawiin rawtna a neih te a thlen nghal bawk a, AYUSH damdawi mipuiten an hman tangkaia an hriatchian theihna tura rawtna a thlen bawk a, Khum 50 awmna AYUSH Hospital leh khum 10 awmna AYUSH Hospital dinna tur atana Union AYUSH Minister Pu Sonowal an lungphum a rawn phum tawh hote a rang lama pawisa sanction sak turin a ngen bawk a ni.

Heng bakah hian Dr R. Lalthangliana chuan AYUSH damdawi daihzai zawka mipuiten an hmuh theih nan AYUSH Ministry in an lo sawihmuh tawhna hmun hrang hrang - Khawhri leh Muallianpui (Hnahthial District), Zawlpui (Lunglei District), Silsuri (Mamit District), Sangau (Lawngtlai District), Lopu (Siaha Diatrict), Zokhawthar (Champhai District), Lungdai (Kolasib District) ah te dah a nih theih nan ruahmanna siam mek a nih thu a sawi bawk.

Minister hi Dr S Mara Thansiami, Deputy Director, Directorate of AYUSH leh Dr Shirley Lalbiakzuali Chhangte, State Nodal Officer, AHWC ten an tawiawm a ni.

Minister hian Ministry of Micro, Small & Medium Enterprises (MSME) Secretary Pu BB Swain-a pawh hmuin Mizorama mau hman tangkaina atana scheme hrang hrangte MSME scheme hnuaia rin luh dan tur chungchang te a sawipui a, he meeting ah hian Addl. Secretary, Director leh official pawimawh te an tel.

Minister hian Ministry of Education dawrin Adviser Manmohan Kaur leh official-te RUSA 3.0 an peih har lutuk te leh thil la fel lo te, tin RUSA 2.0 pawisa la release kim loh te a rang lama release a, tifel rang turin a ngen a ni. Ministry a dawrnaah hian Lalzarliana Hrahsel, Project Manager, Bamboo Development Agency in a tawiawm.

Nimin tlai khan NITI Aayog Member (Health) Dr. VK Paul chuan Dr Thangtea hi zanriah a buatsaih sak a, an inhmuhnaah hian Minister chuan ZMC recognition leh harsatna hrang hrang kan neih thinah MCI Chairman a lo nih tawhna anga thurawn tha tak tak a pek thin avangin Pu VK Paul hi lawmthu a hrilh a ni.