3367/2023-2024

Khawzawl 16th. January, 2024 : Khawzawl District Executive Force te hmalaknaa Khawzawl District chhunga nikum kumtawp lam leh kumin chhunga Heroin No. 4 man Hawng 58 chu vawiin chawhnu dar 2:00 khan KVK Khawzawl Incenerator-ah halral a ni a, Heroin No.4 halral hi International Market a chhutin Rs 29,00,000/- man hu lai a ni.

Vawiin tlaia Heroin No.4 halralna hun hi Addl. DC Pu Lalfakzuala chuan a telpui a. Pu Lalfakzuala chuan Khawzawl DEF te hmalaknaa Heroin No. 4 thahnem tak halral a ni chu lawmawm a tih thu leh nikum lamah pawh tun tuna halral aia tam halral a lo ni tawh tih sawiin hetianga hlawhtling taka No.4 an man hi a lawmpui a, an hlawhtlinna leh thawhrimna hian an hnaah pawh awmzia a neih ngei a beisei tih a sawi a. Ruihhlo halral turin KVK Incenerator kher pan ngai lo tura hmalak dan awm se a duh tih a sawi bawk.

Khawzawl SP Pu Lalchhuanthanga pawhin thu sawiin Khawzawl District-ah hian ruihhlo do bakah hian ala ti ve lo naupang leh thalaiten a hlauhawmzia hriaa an tih lohna turin DC kaihhruaina hnuaiah NCORD in hma ala tih a sawi a, nikum khan mi 2350 hnenah NCORD hmalakna in ruihhlo that lohzia inzirtirna leh Signature Campaign buatsaih a ni tih a sawi.

Khawzawl Sub-Hqrs. YMA President Pu PC. Rosiama pawhin nikum chhung khan Khawzawl khawpui chhungah mi 135 mitthi an awm a, heng zinga a tam zawk hi thalai niin thalai thi tamtak te hi an thih chhanah natna dang ziak mahse Zu leh ruihhlo kaihhnawih a thi an tam tih a sawi a, hei vang hian Zu leh ruihhlo do kawngah tha thlah lova tanlak a tul tih a sawi a. Pu C. Thangchuanga, Asst. Commissioner, END, Champhai pawhin ruihhlo hi thuneitute chauhin do hneh theih a nih loh avangin ruihhlo do kawngah thawhhona tha a awm a tul thu leh END in YMA Anti-Drugs Squad te an hman tangkai thin thu te a sawilang ve bawk.

Vawiina Heroin No. 4 halral inkhawm hi Pu J. Rokima, Addl. SP, Khawzawl in a kaihruai a, he hunah hian Khawzawl DEF Staff te bakah NGO aiawhte an tel a ni.