2200/2024-2025

Khawzawl, dated 25th September, 2024: Vawiin chawhma dar 9:30 khan DC Office kawtah Mizoram State AIDS Control Society (MSACS) leh District AIDS Prevention and Control Committee (DAPCC) huaihawtin Intensified IEC Campaign - India Fights against HIV/AIDS & STIs (sexually transmitted infections) kal zel pualin kawngzawh (rally) huaihawt a ni a, Khawzawl Deputy Commissioner, Pu K. Vanlalthiana'n a vai liam. Kawngzawh ho hian Zaingen YMA Hall panin he hmun vekah hian awareness campaign programme an tel nghal, DC Pu K. Vanlalthiana chu chief guest a ni nghal bawk a ni.

Kawngzawhah hian Khawzawl khaw chhunga school hrang hrang atangin zirlai leh zirtirtute an lo kal a, kawngzawh tan hma hian Dr. Lalnunpuii Renthlei, Medical Officer (Ayush) chuan HIV/AIDS chungchang hriattur pawimawh chi hrang hrang hrilhhriatna hun a hmang. Hemi zawh hian HIV/AIDS leh STI laka inveng fimkhura midang hrilhhre zel turin zirlaiten rinawmna thu an tiam a, DC Pu K. Vanlalthiana'n an kawng zawh tur a vai liam nghal a ni. Kawng zawh te hian lehkha khawng (placard) hrang hrang an lek a, HIV/AIDS leh STI chungchang leh hriat tur bakah inveng fimkhur tura fuihna thu an tarlang a ni.

Awareness campaign programme hi Zaingen YMA Hall-ah hman a ni a, Dr. Albert Lalhminghlua, Medical Superintendent, District Hospital leh Member Secretary, DAPCC chu chairman niin Pu Lalruatzuala, ORW, COD NERC chuan hun a kaihruai. HIV/AIDS leh STI awareness presentation Pi Lalsangpuii Vuite, Counsellor, Integrated Counselling and Testing Centre (ICTC) hnen atangin ngaihthlak a ni a, Khawzawl Superintendent of Police, Pu Lalchhuanthanga'n campaign hmalakna hrang hrang report a pe bawk. Khuallian Pu K. Vanlalthiana chuan thu sawiin thalaite HIV/AIDS leh STI hrang hrang laka an inveng him turin a fuih a, a kai tawh an awm chuan midang kai chhawng lo turin nun uluk turin a fuih bawk. Thisen test hreh a ngai lo tih sawiin test nachang hre turin a sawm bawk a, Khawzawl district hi HIV free a siam nan tangrual turin a sawm bawk a ni. Pu Laldingliana, District Education Officer chuan vote of thanks sawiin hun a khar a ni.

Programme-ah hian IEC Campaign chhunga intihsiakna chi hrang hrang, flash mob dance, placard siam leh debate lawmman sem a ni a, mimal leh group zai hrang hrang ngaihthlak a ni bawk a ni.