1605/2024-2025

Khawzawl, dated 15th August, 2024: Vawiin zing dar 10:00 am khan Mualvawm Field, Khawzawlah Independence Day vawi 78-na lawm a ni a, Minister of State for Sports and Youth Services, LESDE etc., Pu Lalnghinglova Hmar chu khuallian a ni.

Minister Pu Lalnghinglova Hmar chuan hnam puanzar a pawt pharh a, parade contingent te chibai bukna a chhang let.

Hemi zawhah hian Minister Pu Lalnghinglova Hmar chuan thu sawiin Khawzawl mipuite Independence Day chibai a buk a, ni pawimawh tak hmanpui tura an sawm avangin lawmthu a sawi bawk. Khawzawl district chhunga department leh office hrang hrang hnathawh tha leh langsar a sawi lang a, sawrkarin handholding policy leh convergence, thawhhona tha tak a ngaih pawimawh zia a sawi. Excise Minister a nihna angin ruihhlo do a ngaih pawimawh em em thu a sawi bawk a, Excise and Narcotics office Khawzawlah changtlung taka siama hna thawh tir ngei sawrkarin a tum thu a sawi bawk. Ruihhlo do turin state department hrang hrangte, kohhran te leh tlawmngai pawlte an tang em em a, "Task Force on Ruihhlo Do" din tum mek a ni bawk a, Khawzawlah pawh Deputy Commissioner hovin ruihhlo do chungchang thutkhawmna neih thuai tum a nih thu a sawi bawk. Mizoram Sawrkar chuan ruihhlo dona kawnga hma latu tur 'Working Committee on Ruihhlo Do' a din a, Working Committee hnathawhnan August ni 7 khan Mizoam Sawrkar chuan cheng nuai zahnih (₹200 lakhs) a sanction tawh tih a sawi bawk. A thusawi tawp nan sawrkar kal lai mekah hmasawnna a lo thlen zel theih nana thawhhona tha tak a awm zel theih nan mipuite a sawm bawk a ni.

Parade contingent lawmman la tute hnenah Minister Pu Lalnghinglova Hmar chuan lawmman a sem bawk a, lawmman dawngtute chu hetiang hi an ni:

1st - Jawahar Navodaya Vidyalaya (JNV) Contingent
2nd - Far East Experimental School Contingent
3rd - Khawzawl HSS Boys Contingent

Independence Day lawmna zawhah hian Khawzawl Deputy Commissioner, Pu K. Vanlalthiana chuan Minister Pu Lalnghinglova Hmar hi DC Bungalow-ah chhun dar 12:00 pm ah lo lawmin mikhual dangte nen chaw a kilpui a ni.

Independence Day lawmnaah hian Khawzawl Deputy Commissioner, Pu K. Vanlalthiana, Khawzawl Superintendent of Police, Pu Lalchhuanthanga leh district office hotute an tel bawk a ni.