No.1850/2021-2022

Khawzawl, the 15th August 2021: India ram pum pui leh Mizoram khawpui lian deuh te rualin Khawzawlah pawh India ram Zalenna Ni vawi 75-na chu Covid-19 hrileng avanga inkaihhruainate tha taka zawm chungin Khawzawl DC Office kawttualah lawm a ni a. He hunah hian Pu Lalchhandama Ralte, School Education Minister chu khuallian a ni a; Pu C.Lalmuanpuia, MLA, Vice Chairman, Veterinary& Fishery Board leh Pu Lalrinsanga Ralte, MLA, Vice Chairman, Rubber & Allied Crops Board te chu khualzahawm an ni.

Zing dar 8:00 ah Khuallian Pu Lalchhandama Ralte, School Education Minister chuan India Hnam Puanzar chu a ngul chanve atanga a ler thleng pawt chhoin a pawt parh a. Hnam Puanzar zahna chibai 2nd IR Parade Contingent ten an buk chhangletin Independence Day thuchah a sawi chhunzawm nghal a ni.

Khuallian chuan Independence Day vawi 75-na lawm tura sawm bik lo kal te,DC Khawzawl Facebook account in Live a pek chhuah atanga thlirtute, Khawzawl district mipui te leh Mizoram mipui te chibai a buk a. He hunah hian India ramin zalenna a neih theih nana nasa taka lo beitute Mahatma Gandhi leh zalenna sualtu nunna hlan tute pawh kan hre reng a. Kan zalenna hmang tha a, kan chanvo leh mawhphurhna te hre reng a, kan khawtlang leh ram tan tan thar sauh sauh turin ngenna a siam a ni.

Kan hriattlan angin khawvelin hripui rapthlak tak Covid-19 kan tuar mek a. Mizoram pawh nasa takin min tibuai a, Sawrkar, Kohhran, Khawtlang leh chhungkaw khawsal phung pawh nasa takin min sawi danglam mek tih a sawi a. “He hripui bakah Assam leh Mizoram Ramri a harsatna kantawh mek te, African Swine Flu (Vawk hri leng) avangte, Mynmar (Burma) Politics inlumlet avanga kan unau tam tak Raltlan buaipui tur awm ten en kan Sawrkar in hun harsa tak tak a hmachhawn chhoh mek lai hian Mizo mipuite inlungrualna te, Kohhran leh NGO te leh kan thawktu te thahnemngaihna avangin hmalam beiseina thui tak kan nei thei leh hmasawnna hmuh tur tam tak kan hmu sel hi a ropuiin a lawmawm tak zet a ni”, a ti.

Hrileng karah pawh Sawrkar chuan chawl lovin a theih dan kawng te dapin hna a thawk chhunzawm zel tih a sawi. Khawzawl District-ah pawh nikum Independence Day leh vawiin inkarah hmasawnna hmuh tur tamtak a awm tih sawiin hmasawnna langzar zual deuh te a tarlang a ni.

Khawzawl District chu District piangtir te a la nih avangin sawrkar anga hmalakna kalpui turin sawrkar department te din chhoh mek a ni a ti a. Tunah hian District a department la awm tur zinga dah hmasak ngaizual dah nual a ni tawh a ni a ti. Khuallian chuan office hawn thar te leh office awmsa hlankai thar te a tarlang a.

(1) Land Revenue & Settlement Department hnuaiah Settlement Office chu September ni 29, 2020 khan hawn a ni.

(2) District Education Office leh District Project Coordinator Office te chu December ni 15, 2020 khan hawn an ni a. Tunah hian NABARD hnuaiah school thenkhat sak that mek a ni.

(3) District Rural Development Agency (DRDA) office chu March ni 20, 2021 khan hawn niin, April ni 1 atangin tluang takin office hna thawh mek zel a ni.

(4) Planning Department hnuaia District Research Office pawh March ni 25, 2021 khan hawn a ni a, Assistant District Registrar in a thutchilh mek a ni.

(5) Sub-Divisional Agriculture Office ni thin chu District Agriculture Office ah January ni 9, 2020 khan hlan kai a ni.

(6) Hemi bakah hian January ni 14, 2021 khan Divisional Horticulture Office thin chu District Horticulture Office ah Chief Minister, Mizoram in a hawng.

(7) Animal Husbandry & Veterinary (AH & Vety) Department hnuaiah Khawzawla Veterinary office chu March 2, 2020 khan District AH & Vety Officer office a hlankai a ni bawk.

District inrelbawlna zawng zawnga a khaipa, nu leh pa chan chang a nih angin Khawzawl Bawrhsap Office chuan Bawrhsap Office chuan hna pawimawh tak tak a khawih bakah a hnuaia District Department hmalakna te endik leh kaihhruai hna chak takin a thawk char char tih a sawi a. DC Office enkawl bik hnuaiah hmalakna pawimawh tak tak – Covid 19 hrileng dona kawnga hnathawh te, Chief Minister’s Relief Fund hmanga chhawmdawlna kalpui te, District Disaster Management Authority (DDMA) anga chhiatrup lo thleng thulah hmalakna te, National Highway No. 6 (Seling to Champhai) laih meka hna pawimawh tak tak khawih chungchangah te leh State Disaster Response Fund (SDRF) atangin chhiatrupna tuartute chhawmdawlna pekchhuah kawngah te chak takin hna thawh a ni a ti. Hmundangte aiin Khawzawl District chu Hrileng dona kawngah an ti tha zawka; community transmission pawh a la awm niin a hriat tih a sawi a. DC tha taka thawpuiin Khawzawl District chhunga dan leh thupek kenkawh chungah te Superintendent of Police, Khawzawl office pawhin tha taka hna a thawh thu a sawi bawk a ni.

Mizoram Sawrkar chuan zirna lama Khawzawl District in hmasawnna kalkawng a zawh chhoh zelna turin Samagra Shiksha Abhyan hnuaiah Higher Secondary School (Science & Commerce) te a hawng thar a. Kumin 2021-2022 Academic Session hian class tan a ni tih a sawi a. HSS Building changtlung zawk a neihna tur pawhin hma lak mek a ni a. Kum 2021 HSLC leh HSSLC Board Exam Result chhuakah Khawzawl District chu Mizoram puma District ti tha ber a ni tih a sawi. Khawzawl HSS-ah Science leh Commerce zirna hawnthar a ni tih a sawi bawk.

Hripui lengin kan ram leh mitin min tihbuai mek lai pawhin MGNREGS hnuaiah khawtlang leh mimal tana tangkai tak tak hna chi hrang hrang thawh thin a ni tih a sawi a. Wet Rice Cultivation (WRC) siam te, Tui kawng (Irrigation Canal) laih te, Sangha dil, vantlang leh mimal tana Tui dahkhawlna siam te, thlai chinna tur Terrace laih te leh

khawchhung inkalpawhna kawng siam leh chei that te hi a langsar zual te an ni a ti a. Mahatma Gandhi National Rural Employment Guarantee Act: Khawzawl RD Block-ah Mahatma Gandhi NREGS hnuaiah mipui inhlawhna bahlah awm lovin tluang taka thawh a ni a. Kum 2020-2021 Financial Year chhungin Rs. 1900.8 lakh (Cheng nuai sangkhat zakua) sengin Job Card nei chhungkaw 8450 (sangriat zali sawmnga) te tan ni za (100 days) inhlawhna siamsak a ni a. Heng Job Card nei te inhlawhna atan hian hna chi hrang hrang 989 (zakua sawmriat pakua) te chu thawh zawh vek an nih thu a sawi bawk a ni.

PMAY – Housing for All (Urban) hnuaiah Khawzawl, Khawhai leh Biate Town ah te chhungkaw 852 (zariat sawmnga pahnih) hnenah insak tanpuina 1st installment pekchhuah tawh a ni a, 2nd installment hi chhungkaw sawmnga hnenah pek tawh niin, chhungkaw sawmli panga in 3rd installment an dawng tawh tih a sawi a. SEDP hnuaiah Khawzawl Town ah minor work sawmnga pathum zawh fel tawh a ni a. Khawhai Town-ah sawmpali zawh tawh niin, thawh mek panga a awm a. Biate Town-ah minor work pakua zawh tawh niin, thawh mek hi pathum a awm tih a sawi bawk a ni. Khawzawl PHE Watsan division hnuaiah khaw hrang hrangah Tui thianghlim in lakluh hna chak takin kalpui a ni tih a sawi a. SBM(G) hnuaiah Khaw 14 a chhungkaw sawmsarih tan inthiarna siamsak a nih tawh thu a sawi bawk a ni.

Heng bakah hian Department lo inbunna rei tawh deuh leh ngialnghet deuh zawk - School Education Department, Public Works Department, Power and Electricity Department, Public Health Engineering Department, Rural Development Department, UD&PA Department, District Hospital, KVK, 2nd IR Battalion, Agriculture Department, Sericulture Department, ICDS Project, District Veterinary Hospital, Horticulture Department, Irrigation and Water Resources Department, Forest Department leh LAD (Champhai) hnuaia Khawzawl a hmalakna langsar deuh deuh te pawh a hnuaia link:https://dipr.mizoram.gov.in/post/khawzawla-independence-day-2021-lawmna-puala-khuallian-pu-lalchhandama-ralte-honble-minister-schooleducation-etc-thuchah (KHAWZAWLA INDEPENDENCE DAY, 2021 LAWMNA PUALA KHUALLIAN PU LALCHHANDAMA RALTE, HON’BLE MINISTER, SCHOOL EDUCATION ETC THUCHAH). a tarlan ang hian a sawi bawk a ni.

Khawzawl District chu kum hnih chauh a la ni chungin hmasawnna duhawm tak tak te kan hmu chho zel a. Thawktu zawng zawngte chungah lawmthu a sawi a, a bik takin Bialtu MLA Pu Tawnluia, Deputy Chief Minister hmalakna chak tak avangin District in hmasawnna kalkawng chak taka a zawh chho mek chu a lawmawm tak zeta. Khawzawl mipute chu thahnemngai taka Sawrkar tawiawm chho zel turin a chah a ni.

Independence Day vawi 75-na Khawzawl a lawman hunah hian Pu C.C. Lalchhuangkima, Deputy Commissioner, Pu PC Lalchunglura, SP, Khawzawl, Pu Lalrohlua, Addl DC, Pu Ruatsanga Ralte, CO, 2nd IR leh Khawzawl District Heads of Department te bakah sawmbik mi tlem te an tel a. He hunah hian Pu Lianhnuna Sailo, Teacher, Govt M/S - II, Kawlkulh leh Pu Lawmsanga, Teacher, Govt H/S Sialhawk te hnenah Khawzawl District Teacher Award,2021 hlan a ni a. Kum 2020 leh 2021 chhunga 22-Tuichang AC atanga lehkhathiam result nei tha zual mi 13 te hnenah Dy CM Pu Tawnluia, bialtu MLA nibawkin lawmpuina thil pek sumfai chu Khuallian Pu Lalchhandama Ralte, School Education Minister chuan a sem a. Heng zirlai tithate hian Dy CM hnen atang hian Rs 5000/- theuh leh lawmpuina thuziak an dawng a ni. Bialtu MLA PU Tawnluia Dy CM in a bial chhung damdawi in thuam chak nana CSR tanpuina atanga a pek Ambulance te chu Khawhai PHC leh Sialhawk PHC a hman turin Medical Officer incharge te hnenah Pu C.Lalmuanpuia, MLA leh Pu Lalrinsanga Ralte, MLA he huna khualzahawm ten an hlan bawk a ni.