No.1851/2021-2022

Saitual, 15th August 2021: Vawiin chawhma dar 10:00 khan India leh Mizoram state hmun dangte ang bawkin Saitual, District Headquarter, Saitual District-ah pawh Independence Day lawmna inkhawm neih a ni a. Saitual College kawta Independence Day lawmna hunah hian khuallian Pu R.Lalzirliana, Minister, Power & Electricity etc., chuan India hnam puanzar pawtparhin 2nd IR Bn, Khawzawl leh Mizoram Home Guards & CD Band Party ten Hnam Puanzar zahna chibai an buk chu a chhang let a. Indepedendence Day 2021 puala thuchah a sawi chhunzawm nghal a ni.

Saituala Independence Day 2021 lawmna inkhawmah hian khuallian Pu R. Lalzirliana chuan Saitual District-a khawtlang hruaitute, sawrkara hnathawkte leh Saitual District mipui zawng zawngte chibai zalenna ni chibai bukin, India ramin zalenna a hmuh theihna tura theihtawp chhuaha, an nunna hial hlantu mi huaisen pasalthate leh sulsutu, ram hruaitu hmasa te - Mahatma Gandhi, Pandit Jawaharlal Nehru, Sardar Vallabhbhai Patel leh midangte huaisenna leh inpeknate kan hre reng a ni, tiin zahna chibai a buk a ni.

Khuallian chuan ram buai hre phate chuan hnam dang leh ram dang thuhnuaia awm hrehawm zia kan hrethiam lehzualin a rinawm a, he zalenna ni champha kan thlen hian kumpinu sawrkar hnuaia kan awm laia inrahbehna leh diklo taka chanvo inchhuhsakna kan ramin kan tawh thin lai hrehawmzia leh zalenna avanga mihring dikna, hlutna leh zahawmna par chhuak hlutzia min hriatchhuah tir a. Zalenna nei tura ram mipuite impumkhatna leh thawhhona pawimawh zia a tilang chiang hle a ni, a ti.

Covid-19 vanga kan ram in harsatna kan tawh mek belchhah turin ramri ah harsatna kan tawk bawk a. Heng harsatna kan tawh mek laia Zoram mipuite thuawihna leh tan rualna ka hmuh hian lawmawm ka ti takzet a ni, a ti a. Ramri a buaina kan tawh hi ramri a khua thenkhatte buaina tur emaw kan ti ang tih hi ka hlau hle a, ram leh hnam inpumkhatna leh tanrualna tihlanna hun tak a ni tih hre thar leh ila, heng harsatna kan tawh atang hian mahni intodelh a pawimawh zia zirchhuak thar leh ila, hmasawnna ruhrel siam kawngah te leh hmanrua leh bungrua (asset) kan neih tawhsa enkawl kawngah pawh sawrkar thawhpui thiam tur leh mahni ke a ding thei tura tan kan lak hi a pawimawh hle a ni, a ti a. India rama mipui hlim ber leh ram ralmuang ber kan nihna piah lamah, ram hmasawn leh intodelh ni tura tan la turin Saitual District a khawtlang hruaitu, sawrkar official te leh mipuite a sawm thar leh a ni.

Sawrkar thar hmalakna a Saitual District a lo pian achinah hmasawnna kan hmu chho mek zel a, mipui mamawh Department hrang hrang mipui mimir banphakah chhawp hnaih zel niin, tunah phei chuan Department leh Office hrang hrang 20 lai mai Saitual District in kan han nei ta te hi a lawmawm hle a. Covid-19 hri leng avangin kan tum ang leh kan duhthusamin thil a kal chak theilo a, chuti chung chungin kan hmachhawp hrang hrangte tihhlawhtlin a ni zel hi a lawmawm a ni a ti a. Mipui tan a awlsam zawk nan tuna kan neih Department hrang hrangte bakah Department dang pawh dah belh thuai tura hmalak mek zel a ni tih a sawi bawk a ni.

Saitual District chhunga hmasawnna ruhrel pawimawh tak tak kawng, tui in tur supply, eng chhit tur neih bakah ei leh bar zawnna kawnga Argiculture leh an zawmpui Department te hmalakna a fakawm hle a ni, a ti a. Anni bakah hian Department thar engemawzat kan neih ten, tun hnai lawka din thar an ni tih hriat miah loh khawpa hun reilote chhunga hlawhtlinna chhuanawm tak tak an han nei chhote ka hmuh hian Department hotute leh thawktute inpekna leh thawhrim zia a ti lang chiang hle in ka hria a, a lawmawm ka ti takzet zet a ni, a ti.

Kawlphetha lama kan lo hnianghnar zawk theih nan Keifang ah 10 Mega Watt Solar Power Plant siam turin ruahmanna siam mek a ni a, hei hian nasa takin kan kawlphetha mamawhna engemaw chenah min phuhruk theih a beiseiawm a ni, a ti a. Rs. Nuai 1000 senna tur Deputy Commissioner’s Office sak hna hi thawh mek a nih thu a sawi a, khawtlang inrelbawlna atana pawimawh tak VC House sakna tur Saitual District huam chhungah engemaw ruahman a nih thu sawiin, VC House la neilo te pawhin an neih theih nan theihtawpin hma an la zel tih a sawi a ni.

Hripui leng dona kawngah District Administration te, Police te, Hospital a thawktu zawng zawngte leh kan khawtlang hruaitute hmalakna a fakawm a tih thu sawiin, khuallian chuan a bik takin Covid-19 do kawngah kan NGO te leh Kohhran hruaitute inpekna hi sawi hmaih phal chi niin ka hre lo va, kan hriat theuh angin hripui leng hi awlsam tak inkaichhawn thei a ni chungin, mipuite kan lo him theihnan tiin mahni hrehawm pawisa lo leh hri kai hlau chung chung pawha kan khawtlang dah hmasa a an rawn penchhuah thinna hi a hlu tak zet a, kawtthlerah a sur a sa hnuaiah duty na hmun siamin, Covid 19 veite enkawlna hmun 4C ah te damlote mamawh leh a tul tul buaipui kawngahte leh Home quarantine lai ten ei leh in tur an tlakchham loh nan tiin ruahmanna fel tak siama in tha leh zung in thawhna zawng zawngah lawmthu ka sawi tak meuh meuh a. Mizote kan inchhuan em em na, Zonun zemawi Tlawmngaihna dik tak he hripui leng karah hian in lanchhuah tir hi a hlu hle in ka hria a ti.

Independence Day lawmna a kalkhawmte chu mi tlemte ni mah ila, mipui leh sawrkar in hna pawimawh tak chelh tura an rin ngam leh hmasawnna thlen thei tura an ngaih leh beisei, khawtlang hruaitute kan ni a. Dinhmun pawimawh taka min dahtu sawrkar leh min thlang tlingtu mipuite tana hmasawnna thlentu, kawng kawhhmuhtu ni tura rilru leh ngaihtuahna seng theuh turin a fuih thar leh a ni.

Dristrict mipuite hripui leng laka an him theih nana Sawrkar thuchhuak ngaih pawimawh kawngah leh tihlawhtling tura hma an laknaah lawmthu a sawi a. Khawtlang hruaitute pawh Sawrkar hmalakna hrang hrangah sawrkar thawhpui thiam zel tur leh tihsual laka hotute veng thiam tua chahin, thawhhona tha nena Saitual District in hmalam a pan zel theih nan rilru ngaihtuahnate seng tlang zel turin mitin a ngen a ni.

Thawhhona tha neih a pawimawhzia sawiin Minister chuan ram hmasawnna hi mi pakhat chauhin a thlen theilo ang bawk hian, Department pakhat chauhin ram mipui tan hmasawnna tluantling a thlen thei lo tih kan hriat tlan a tul in ka hria, a ti a. Kan Department in project tha tak neiin sum leh pai pawh dawng hnem deuhin mipui lamah kan Department hming a langsar viau pawh a ni mai thei. Amaherawhchu, Department dangte nena thawhho kan thiam loh a, mahni Department ah ringawt kan inthlurbing chuan hmasawnna tluantling mipuite tan kan pe thei thin lo tih hi i hre thar leh ang u, a ti.

Saitual District hi vanneihzia sawiin District thar kan nih phat atangin Department hotu fel tak tak kan nei a, kan nei mek zel bawk a ni a ti a. Department hrang hranga hotute inlungrual taka thawkho thiam zel tura chahin, Project duan kawngah pawh Department hrang hrangte thawkho thiam tur leh lang tlang taka hna thawhho theih nan Head of Office theuh te tang tlang lehzual turin a chah a ni.

Khuallian hian Independence Day thuchah a sawi zawh hian Saitual District chhunga zirtirtu tha leh zirlai tithate chawimawina a hlan nghal a, heng chawimawna hlan te hi a hnuaia tarlan ang hi an ni :
Zirtirtu tha chawimawina :
1) Pu Zionthanga, Principal, Presbyterian English School, Keifang

2) Pu Gilbert Lalhriatpuia, Headmaster, Tawizo Middle School

Zirlai ti tha chawimawina
1) Lalsanglura s/o H. Lalremvela, Saitual Dinthar Veng
B.Sc (Math) Topper under MZU

Chawimawina thuziak (citation), Silver Medal leh Tangkafai Rs. 5000/- an dawng a, Lalsanglura hi khuallian hian laptop thar a pe bawk a ni.

Covid-19 hrileng avangin Saituala Independence Day 2021 lawmna inkhawmah hian mipui leh official tam zawk te an tel thei lova, parade contingent march-past pawh an awm lo a, 2nd IR Bn, Khawzawl ten Hnam Puanzar Rashtriya Salute an pe a, Mizoram Home Guards band party ten National Anthem an tum a ni.