No.1852/2021-2022

Dated Serchhip, the 15th August, 2021: Tukin zing dar 8:00 am khan India ramin zalenna a hmuh champha vawi 75 na chu Serchhip DC Office tualah a lawmna neih a ni a, he hunah hian Pu Lalrintluanga Sailo, honourable Deputy Chief Whip, Government of Mizoram chu khuallian niin hnam puanzar a pawt pharh.

Zing ni chhuah rualin Serchhipa sawrkar pisaah ah te India hnam puanzar zar a ni a, chumi zawhah Serchhip a Hospital, Home, Special School leh Jail ah te thilpek hlanna neih a nih leh hnuin a lawmna pui ber hi DC Office tualah zing dar 8:00 am ah neih zui a ni a. Serchhipa sawrkar head of offices, chanchinbumite leh sawm bik mi tlemte chauh an tel a ni.

Hnam puanzar a pawhpharh zawhah khuallian hian thusawiin, India ramin zalenna a neih theih nana beitu Pu Mahatma Gandhi te, Jawahar Lal Nehru te, Sardhar Vallabhai Patel te leh hruaitu hmasate zahna chibai bukin; zalenna zarah vawiinah chuan India ram chu khawvela democracy ram ropui ber te zinga mi kan ni ta hial a. Mizoram ngei pawhin hmasawnna tam tak hmuin, Serchhip District pawh chu hmasawnna chhawr nasa tute zinga mi chu kan ni, a ti. Serchhip district chu India ram puma ziak leh chhiar thiam tamna district kan ni ta hial a, ram hmasawnna tehna pawimawh tak pakhat Infant Mortality Rate ah pawh dinhmun tha takah a awm deuh reng thei a ni. Tun hnaiah Covid19 hripuiin nasa takin khawvel a nuai meka, he hripui dona kawngah pawh thawktute inpekna leh mipuite thuawihna avangin Serchhip district chu dinhmun tha takah a ding reng thei a, vaccine lak thuah pawh a titha pawl kan ni zel a ni, a ti a. Hripui dona kawnga thawktu zawng zawngte chungah lawmthu sawiin; tha thlah lova bei zel turin a chah a ni. Pu Lalrintluanga Sailo chuan, hripui leng karah mipuiten kan mamawhna avangin tha takin ni za inhlawhna kalpui a ni a, hmasawnna hnathawh dangte pawh a theih chen chen kalpui zel a ni. Kawng tinrengah hmasawnna kan hmu zel a, kawngpui siam hnate, Power & Electricity hmasawnna te, zirna hmasawnna te, mipui nawlpui eibar zawnna lama hmasawnna te, faina leh tui thianghlim hnianghnar kawngahte a kum telin kan thang chho zel a ni, a ti. Khuallian hian, ramri buaina thuah Mizo mipuite thinlung hmunkhat pua kan tan hona chu chhuan tlak a nih thusawiin ramri venhimhna thawktu zawng zawngte chu chhuanawm a tih thu a tarlang bawk.

Khuallian hian kumina HSLC leh HSSLC Exam-a Serchhip District atanga Top Ten tling phakte hnenah leh a titha zual school panga thlan chhuahte hnenah Beti Bachao Beti Padhao kaltlangain lawmpuina thilpek a hlan a. District chhunga AB PM-JAY kalpui tha ber Hospital, Serchhip District Hospital hnenah Bawrhsap Pu Kumar Abhishek, IAS chuan lawmpui a hlan bawk a, Bawrhsap hmalaknaa SBI Foundation ten CSR hmanga Ambulance Serchhip District tana an pek chu Pu L.P Lalchangkima, Regional Manager, SBI chuan Dr. Laldawngliana Sailo, CMO hnenah a hlan bawk a ni.

Kum danga neih thin VIP at Home programme erawh chu buatsaih a ni ta rih lo a ni.