No.1853/2021-2022

Champhai, the 15th August, 2021: India ram zalenna ni Independence Day vawi 75-na chu Champhaiah tukin dar 8 khan Khuallian Pu T.J. Lalnuntluanga, Law & Judicial, EF&CC, Transport leh Parliamentary Affairs changtu Minister hovin DC Bangla tualah urhsun taka lawm a ni. Khuallian hian hnam puanzar pawt pharhin Police contingent chibai bukna a chhanglet a, Ayushman Bharat Pradhan Mantri Jan Arogya Yojana (AB PM-JAY) kalpui tha Damdawiin hnenah chawimawina thuziak cheimawi a hlan bawk. He hunah hian Champhai DC Pi Maria C.T Zuali, SP Pu Lalrinpuia Varte, Heads of Office-te leh sawm bik mi tlemte an tel a ni.

Pu T.J. Lalnuntluanga chuan India Independence Day pualin Champhai District mipuite chibai a buk a. British awpbehna atanga India ramin August ni 15, 1947 a zalenna ni ropui tak neihna champha vawi 75 na hman a ni ta chu a ropuiin a hlu hle a ni, a ti a. India ramin zalenna a neih theih nana ram hruaitu hmasa leh martarte inpekna leh inhlanna chu fakawm a tih thu sawiin, an inpekna leh inhlanna ropui takte chu hre thara zahna thinlung nena Independence Day hmang turin District mipuite a sawm a ni.

Khuallian chuan hripui leng karah sawrkarin mipuite mamawh phuhru turin theihtawp a chhuah reng thu sawiin, chhuanchhama mipui awm loh nante leh hmasawnna hnathawh kawngah hun khirhkhan tak hnuaiah a theih ang zela hnathawh mek zel a ni, a ti a. Department tinte thawhrimna leh inpeknate chu mipuiin an hlawkpuia, hamthatna atan an hman ngei a beisei tlat thu sawiin, ram leh mipuite tan theihtawp chhuah zel turin a chah a. Myanmar ramri depa awm Champhai District-ah insumdawn tawnna tichangtlung turin sawrkarin theihtawpa hma a lak thu tarlangin, Land Custom Station Zokhawthar thuam thatna turin Scheme for Special Central Assistance to States hnuaiah sum Financial Year 2020-2021 chhungin cheng vaibelchhe 15 hmuh niin, hun rei loteah hna hi tan theih beisei a ni, a ti a. Hri leng vanga kum khat chuang zirna inte hawn mumal theih loh a ni chunga zirtirtute leh zirlaite inpekna leh thawhrimna zarah tunhnaia result chhuaka pawl 10, 12, BA leh B.Ed ahte Champhai District-in result tha tak a nei chu chhuanawm a ti a. Champhai District atanga state pum huapa a thiam zual top-10 a lang phate chu chhuanawm tiin, zirlaite chu zirna uar sauh sauh turin a chah a ni.

Environment Forest & Climate Change Minister ni bawk chuan tui hna kang chat mai thei dinhmuna dingte thawmthat a nih theihna turin thingphun hna scheme hrang hrangte mipui leh NGO-te tel theihna tur hawi zawnga ruahmanna siam a nih thu sawiin, sawrkar, NGO-te leh khaw mipuite thahnemngaihna zarah tun hnaiah Dampa Tiger Reserve-ah Sakei hun rei tak chhung hmuh tawh loh hmuh leh a ni a, hei hian kan ram hi sahuaite tan chenna tlak a la nih zia a tilang chiang hle a ni, a ti a. Mipui ten ramsa, thing leh mau hlutna leh pawimawhna an hriat thar zel theihna turin Aizawl Zoological Park tihchangtlun hna kalpui mek a nih thu leh, Mizorama la awm ngai lo Sakei, Royal Bengal Tiger pahnih (2) dah tura ruahmanna siam fel a nih tawh thu a sawi a. NEC Project- Afforestation of Denuded Hills in Champhai District kalpui mekah Mualzen Nursery-ah nakuma thingphunna turin ram hectare 369-a zau-ah hma lak mek a ni a, Zotlang khawhluiah Botanical Garden din tura hma lak zel ni bawkin, bul tan nan View Tower, water storage tank, fencing, Interpretation Centre leh vehicle parking lodge-te kumin chhung hian thawh tuma hma lak mek a ni, a ti bawk.

Transport Minister Pu T.J Lalnuntluanga chuan hripui leng avanga motor neite leh sumdawn nana motor hmang ten chhiah pek chungchanga harsatna nasa tak an tawh chu sawrkar chuan a hriatpui thu sawiin, Sawrkar laipui ruahmanna siam zulzuiin February ni 1, 2020 atanga September ni 30, 2021 chhunga motor document thite chu nungah (valid) pawmsak an ni a, hemi hun chhung hian an motor document-te chu late fee chawi lovin tihnun sak an ni, a ti a. Chhiah pek chungchangah mipui ten awlsam zawka Transport Department an dawr theihna turin Online Payment September, 2021 atanga hman tan theih tura ruahman ani a, District hrang hranga motor nei ten Pollution Under Control Certificate chungchanga harsatna an tawh thin pawh District pariat (8) ah Pollution test-na khawl Pollution Analyser mipuite hman tangkai theih turin DTO office-ah dah fel tawh a ni, a ti bawk.

Power supply chungchanga Champhai District tihchangtlung nan sawrkarin 132 kV line Khawzawl to Champhai inkar line thar thlung tura ruahmanna a kalpui mek thu pawh a sawi a. Champhai District Hospital-ah Covid-19 enna khawl Truenat pakhat dang dah belh tura phalna neih a nih tawh thu leh, khawl chah thlen veleha bun fel tum a nih thu a sawi a. Dialysis leh ICU kalpui mek a nih tawh thu pawh sawiin, Trauma Centre sak mekte, minute khata Oxygen litre 500 siam thei Oxygen Generating Plan changtlung leh lian zawk District Hospital-ah bun mek a nih thu a sawi bawk a. Champhai Nursing Hostel sa tan tura ruahmanna peihfel a ni a, Sub-Centre awmna hmunte Wellness Centre a hlankai tawh niin, hma bak khaw 5 te pawh Wellness Centre a hlankai tura hmalak mek a ni, a ti bawk.

Law & Judicial Minister chuan Champhai District Executive Force hnuaia Police Officer thawk lai, India rama hnuchhui kawnga mi thiam chungchuang 152 thlanchhuah zinga tel leh 'Union Home Minister's Medal for Excellence in Investigation - 2021' chawimawina dawngtu Sub-inspector Pu V.L. Chama Ralte, Dungtlang Police Station OC chu a lawmpui thu a sawi a. District Court-in kumin chhungin civil case 208 leh criminal case 256 an chin fel hman thu leh, fine leh thil dang atangin sawrkar sum bawmah Rs. 14,87,000/- an chhung luh thu a tarlang a. Hripui do kawnga District Level Task Force, Village Level Task Force, Village Council leh tlawmngai pawlte inkara thawhhona tha tak awm chu fakawm tiin, hri dona kawnga an pen zelnaah duhsakna a hlan a. Mipuite chu hri laka fihlim turin midangte hlata awm fo turte, kut silfai tha tur leh hmai tuam zawm hram hram turin a chah a ni.

Independence Day lawmna hunah hian Ayushman Bharat- Pradhan Mantri Jan ArogyaYojana (AB PM-JAY) kalpui tha Champhai District-a Damdawiin thlan chhuah, District Hospital Champhai leh Med-Aim Adventist Hospital-te hnenah khuallianin chawimawina thuziak cheimawi a hlan bawk.