No.1854/2021-2022

Kolasib dated 15th August 2021: Vawiin chawhma dar 8:00 AM khan DC Office, Kolasib tualzawlah India ram zalenna ni champha vawi 74-na lawmna hun neih niin Pu K.Lalrinliana, Minister of State for Food, Civil Supplies & Consumers Affairs Department chu khuallian a ni a. Hrileng avangin zirlai naupang parade contingent awm lovin Kolasib District chhunga Sawrkar department hrang hrang hotu sawm bik te leh tlawmngai pawl aiawhte an tel a ni. District Hospital, Kolasib chu Kolasib district chhunga Public Hospital zinga Ayushman Bharat Pradhan Mantri Jan Arogya Yojana kalpui tha lawmman hlan an ni bawk.

Khuallian Pu K.Lalrinliana chuan Covid-19 hri len mek lai a, ramria buaina chhuak leh vawk pul hri leng ve mek karah, Kolasib chu Mizoram luhkapui a nih angin mipuiin harsatna an tawh loh nana Kolasib district-a Sawrkara thuneitute, tlawmngai pawl hrang hrangte leh mipuite thawhhona leh inpeknaah lawmthu a sawi a, ramri venhim kawnga Mizoram Police-te huaisenna chu ropui a tih thu a sawi bawk a ni. District chhunga hmalakna hrang hrangte tarlangin Supply Godown Kolasibah 750 MT leh North Hlimenah 150 MT a lian sak thar a nih thu a sawi a, Mizoram pumah Godown 21 sak belh mek niin a dang 38 sak nan ruahmanna siam mek a nih thu a sawi bawk a ni. Gas Bottling Plant siamthat leh tihlenna turin Mualkhangah ram leifel tawh a nih thu leh hma lak vat a nih theih nan IOCL kutah hlan fel tawh a nih thu khuallian chuan sawiin Oil Depot bunna tur pawh buaipui mek a nih thu a sawi bawk a ni.

Minister hian Department hrang hrangte hmalakna a tarlan zingah District Hospital, Kolasibah Laparoscope tih theihna khawl dah a nih tawh thu leh Dialysis tih theih turin inbuatsaih mek a nih thu a sawi a, NESIDS kaltlangin khum 100 awm theihna Hospital ni tura sakthat tum mek a nih thu a sawi bawk a ni.

Tokyo Olympic-a India Hockey team zinga Mizo nula Lalremsiami chu mizo mai ni lovin rampum tihmingthatute zinga mi a nih thu sawiin Pu K.Lalrinliana chuan Mizoram sawrkarin a mah chawimawi nan Kolasibah In hmun leh Mizoram sawrkarah hna an pek tur thu a sawi a, pawisa nuai 25 pek a nih tur thu a sawi bawk a ni.

Supply Minister chuan hrileng avanga harsatna hrang hrang kan hmachhawn tawhah leh ramri buaina avanga harsatna kan tawn thin atangte hian mitinin mahni phak tawk theuhah intodelh tuma hma la theuh turin a chah a. Hrileng lak a fimkhurnate intihhmuh zelin vaccine lak ngai pawimawh theuh turin mipuite a ngen bawk a ni.

Kolasib district chhungah hian Kawnpui SDO(Civil) Office, Thingdawl BDO Office, Bairabi SDC Office leh Vairengte SDO(C) Office-ahte Independence Day lawmna hun hi hman a ni.