378/2022-2023
Khawzawl, the 2nd May, 2022: Khawzawl District aiawha 18th Inter-District Boxing Championship 2022, April ni 18-22, 2022 chhunga Aizawl Ramhlun Boxing Hall-a neih zawh taka boxer chhuakte lawmpuina hun chu vawiin khan DC Conference Hall-ah neih a ni a, he hun hi Addl. DC Pu Lalvenhima chuan a telpui a ni.

Pu Lalvenhima chuan infiammite chu ruihtheihthil laka fihlim turin a chah a. Mizoten boxing-ah theihna nasa tak kan neih thu sawi langin, boxing chu infiamna dik leh langtlang tak a ni, a ti a. Eizawnna kawng tinrengah beidawng lova theihtawp chhuah thin turin thalaite a fuih a, mi tumruh leh taima an hlawhtlin thin thu a sawi bawk. DC Pu C.C. Lalchhuangkima hmalakna zara lawmpuina hun buatsaih a ni chu lawmawm a tih thu a sawi lang bawk.

Lawmpuina thusawitu dang SDO (Sadar) Pu James Lalnithanga chuan Khawzawl District Boxing Association (KZDBA) hmalakna fakawm a tih thu a sawi bawk.

He hunah hian Pu Lalhruaitluanga Varte, Secretary, KZDBA hnen atangin report tawi ngaihthlak a ni a. Boxer 13 te Khawzawl District atanga an chhuah thu leh Gold Medal pakhat, Silver Medal panga leh Bronze Medal paruk an lak thu a sawi bawk.

Championship-a medal dawngtute hnenah hian DC Office hmingin lawmpuina thuziak cheimawi pek an ni.