377/2022-2023
Aizawl, the 2nd May, 2022: Vawiin khan Lunglei DC Pu Kulothungan A, IAS chuan Lunglei District Jail, Sazaikawn a tlawh.

Lunglei DC hi DIPRO Pi C. Lalremruati’n tawiawmin District Jail Superintendent Pu C. Lalbiaktluanga leh a thawhpuiten anlo dawngsawng a ni.

District Jail ah hian thawktute leh jail tangte nen inkawmhona hun neih niin Pu Kulothungan A chuan Disitrict jail dinhmun tlangpui te leh an mamawh te zirchiang tura tlawh anih thu a sawi a. Jail tangte hnenah fuihna thu sawiin Jail chu an nun siamthatna hmun atana hman tum tur leh an chhuah hunah pawh khua leh tui tha, ram leh khawtlang tana mi tangkai ni tura inpuahchah turin a chah a. Jail an awm chhunga thiam thil zirna (skill development) ruahman sak a ngaih pawimawh takzet thu DC chuan sawiin an mamawh hrang hrangte inthlahrung hauh lova a hnena thlen thin turin a chah a ni.

District Jail thawktute leh jail tangte hian an mamawh hrang hrang te DC hnenah lo thlenin DC chuan CSR kaltlangin leh Department hrang hrang te nena tangkawpin District Jail mamawhte chu tih hlawhtlin sak ngei a tum thu a sawi a ni. An mamawh thlen te zing ami a thlawna inentirna (free health camp) chu buatsaih sak thuai anih tur thu a puang nghal a ni.

Lunglei District Jail hi Sazaikawnah awmin 19.9.1977 ah hawn a ni a. Mipa 103 leh hmeichhia 10 an zavaiin mi 113 an leng a. Tun dinhmunah mipa 115 leh hmeichhia 15; an zavaiin mi 130 awm mekin District Jail hi a chep hle thu thawktute hian an report a ni. Tun dinhmunah thawktu mi 38 an awm mek a ni.