4782/2025-2026

Dated Khawzawl, 11th March, 2026: Vawiin chawhma dar 11 khan One Stop Centre (OSC), Zuchhip Veng, Khawzawlah International Women’s Day pualin Mahila Jan Sunwai hman niin hmeichhia harsatna tawk te tana Free Legal Public Hearing neih a ni a, Addl. DC Pu K. Zorammuana’n a hmanpui. He hun hi National Commission for Women, New Delhi leh, Mizoram State Commission for Women, Deputy Commissioner, Superintendent of Police, District Legal Services Authority leh Women & Child Development Department te nen tanghoa hman a ni.

He hun hi Pi Lalchhuanmawii, Member, Mizoram State Commission for Women (MSCW) in a kaihruai a, Addl. Deputy Commissioner, Pu K. Zorammuana, Pu Jerry Lalrinsanga, Deputy Superintendent of Police, Khawzawl, Pi Lalrinthangi, President, Sub- Hqrs MHIP leh Pu Lalchawiliana, Advocate, DLSA Champhai atangin thu sawi tha tak tak ngaihthlak a ni a, heng bakah hian Hmeichhia harsatna tawkte tan an harsatna ngaihthlakna hun Free legal Public Hearing neih nghal a ni bawk.

He hunah hian Hmeichhia dikna chanvo rahbehna hrang hrang tuar te tan complain thehluhte ngaihthlakna hun neih a ni a. Complaint hi Deputy Commissioner, Superintendent of Police, District Programme Officer, Women & Child Development Department leh Child Development Project Officer (CDPO), Women & Child Development Department te hnena thehluh niin, inchhungkhur leh hnathawhna hmuna hleihlenna hmeichhiate chunga eng kawng pawha harsatna tawk te, nupa kara harsatna avanga hmeichhe chunga tawrhna thlengte, chhaih nawmnah tawkte leh eng kawng pawha hmeichhia nihna avanga hleihlenna leh nek chepna tawkte’n harsatna an thlen a ni.

He hunah hian, Pi T. Lalnuntluangi, OC, Khawzawl Police Station, Pi Esther Laltlinpuii, CDPO, Khawzawl ICDS Project bakah MHIP Sub- Hqrs OB’s, ICDS staff , Anganwadi Worker (AWW) & Anganwadi Helper (AWH) Khawzawl te leh OSC staff te an tel a ni.