2149/2023-2024

Khawzawl, 4th October, 2023: Vawiin khan Khawzawl DC Conference Hall-ah kumin MLA General Election-a 22-Tuichang Assembly Constituency (Khawzawl District) a hman tur ‘Final Electoral Roll’ chu Pu K. Lalrohlua, Khawzawl Bawrhsap leh District Election Officer (DEO) ni bawk chuan a tlangzarh a. Political Party aiawh bakah Booth Level Officer te hnenah Roll copy hi a hlan nghal bawk.

Roll tlangzarhtu Khawzawl DEO Pu K. Lalrohlua chuan BLO kalkhawmte chu Electoral Roll buatsaihna kawnga an hnathawhah lawm thu a hrilh a. BLO te chu inthlan lo awm zel turah pawh mawhphurhna pawimawh tak an neih zia hria a, fimkhur taka an hna thawk zel turin a chah. Bawrhsap hian rualbanlo (PwD) leh kum 80 chunglam te chuan an chenna inah vote an thlak thei dawn tih he hunah hian a tarlang bawk.

Roll tlangzarhna inkhawm hi Khawzawl Election Officer, Pu Timothy R. Lalhmangaiha chuan a kaihruai a, inlawmna thu sawiin party tin aiawh Booth Level Agent te chuan BLO te hnenah Roll tlangzarh tak hi an lak theih tur thu a sawi a ni.

Electoral Registration Officer Pu Vabeimozachhi Chozah chuan Electoral Roll tlangzarh tak sawifiahna hun a hmang a. Report a tarlan danin Final Electoral Roll hi Draft Roll August ni 2, 2023 a tihchhuah behchhana butsaih a ni a, 2nd Special Summary Revision neih niin, vawiinah hian Final Roll tihchhuah a lo ni ta a ni. October ni 1, 2023 a kum 18 tling chin te Roll-ah hian ziahluh an ni. Draft Roll-ah hian voter 17,440 - mipa 8690, hmeichhia 8750 an awm a; 2nd Special Summary Revision neihah hian voter 532 (mipa 251, hmeichhia 281) ziah luh an ni a, voter 497 (mipa 244, hmeichhia 253) paih niin Final Electoral Roll ah hian voter 17475 (mipa 8697, hmeichhia 8778) an awm ta a ni. Voter punna zat hi 100 zela 0.20% niin, voter 35 an awm belh a ni. Tuichang AC huamchhungah hian Service voter 97 an awm mek tih tarlan a ni bawk.

Roll tlangzarhna inkhawm neih zawhah hian Khawzawl DC Pu K. Lalrohlua hovin Mizoram People’s Forum leh party tin aiawh ten inkawm khawmna an nei a, inthlan kaihhnawiha hriattur hrang hrang te inhrilhfiahna hun an hmang. State Level Master Trainer Pu Lalthakima Chhangte hovin BLO te tan training neih a ni bawk.

22-Tuichang AC Final Electoral Roll khaikhawmna (General Summary) hi a hnuaiah hian en theih a dah a ni.

SSR 2023 PUBLICATION OF FINAL ELECTORAL Summary.docx