2682/2022-2023

Khawzawl, the 15th November, 2022: India ramin zalenna a hmuh champha vawi 75-na, Azadi Ka Amrit Mahotsav (AKAM) lawmna kalpui mek zelah tukin khan Tribal hnam zing atanga zalenna hmuh theih nana thawhhlawk tak tak leh nunna hlu tak hlantute zahna lantirna leh hriatrengna, Janjatiya Gaurav Diwas pualin Khawzawlah hun hman a ni a; he hun hi District Bawrhsap Pu C.C. Lalchhuangkima chuan telpuiin he ni puala hnam lam hmanga kawngzawh a vailiam a ni.

He hun puala inkhawm tawi Taidawnkawn, Zaingen Venga buatsaih hi Pu Lalvenhima, Addl. DC Khawzawl chuan a kaihruai a. District Bawrhsap Pu C.C. Lalchhuangkima leh Pu C.Lalnilawma, Chairman, Cultural-Sub Committee, Sub Hqrs YMA Khawzawl-te hnen atangin thusawi ngaihthlak a ni a. Janjatiya Gaurav Diwas hman anih chhan leh India ram zalenna atana tribal mite zinga mi huaisen leh chhuanawm tak takte chanchin ngaihthlak a ni.

Janjatiya Gaurav Diwas puala hnam lam hmanga kawngzawhah hian Branch YMA hrang hrangte an tel a, Zaingen Veng chhung Taidawnkawn atanga Venglai Biak In kawt thleng hnam lam mawi tak entirin kawng an zawh a ni.

Sawrkar laipui chuan nikum atang khan November ni 15 hi tribal-te zinga India ram zalenna sualtu mihuaisente hriatrengna leh chawimawina ni, Janjatiya Gaurav Diwas atan a puang a. November ni 15 hi zalenna sualtu hruaitu mihuaisen leh langsar tak, tribal leader Birsa Munda piancham denchhena Janjatiya Gaurav Diwas atana puan a ni.