No.7703/2020-2021   

Nimin khan Pu Zothanmawia, Deputy Commissioner, Khawzawl District kaihhruaiin DC’s Conference Hall-ah Juvenile Justice Act, 2015 hnuaia naupang tanpui ngai leh venhim ngaite chungchang ngaihtuahin meeting neih a ni.

Bawrhsap Pu Zothanmawia chuan Juvenile Justice Act in naupang tanpui ngai leh venhim ngai a tihten Social Welfare scheme hrang hrang hnuaia an chanvo dawn turte an dawn a, an chan ngei theih nan ngaihtuahna seng turin member-te a sawm a ni.

Meeting-ah hian Juvenile Justice Act hnuaia mipui hriattur pawimawh leh langsar zualte  zau taka thehdarh nise tiin rel a ni a. Khawzawl District chhunga hetiang naupangte dinhmun database mumal tak siam a, an chanvote an dawn ngei theih nan line department dangte nen thawhho nise tih a ni bawk.

Meeting-ah hian Pu James Lalnithanga SDO (Sadar), Pu Lalringliana Pachuau Additional SP, Pu Lalrinmuana CDPO, Dr. Saithangpuia, BDO leh Pu H. Lalramenga SDC te an tel a ni.