No.7425/2020-2021

Vawiin chawhnu dar 3:00 khan Mizoram khawpui fai intihsiak-a Khawzawl Town-in Category-I (District Headquarters) zinga lawmman pathumna a lak lawmna hun DUDO Pisa tualah hman a ni.

Lawmna programme Pu James Lalnithanga, DUDO/SDO(S)  kaihruaiah hian Pu Zothanmawia, Deputy Commissioner, Khawzawl District chuan thusawiin, District naupang te ni chunga Khawzawlin lawmman a la thei chu UD&PA a thawktu officer leh staff-te, khawtlang hruaitute leh tlawmngai pawl hrang hrangte tanrualna leh thawhhona that vang a ni, a ti a. Faina chu District hmel lanna darthlalang pawimawh tak, Mizoram chhung hmundang leh State pawnlam thlenga Khawzawl hming tilangsartu a ni thei a ni, a ti a. Faina chu Covid-19 hrileng do na kawngah pawh a pawimawh hle tih sawiin, nitin nunphunga faina sengluta, hmasawn zel a ngaih thu a sawi bawk.

Pu Lalrohlua, Additional Deputy Commissioner chuan khawpui fai intihsiaka endikna criteria hrang hrangte sawiin, intihsiakna la awm leh tur atana inbuatsaihna tha zawk kalpui dan tur ni a langte a tarlang a. Khawzawl town chhunga VC leh NGO te thawhhona tha chu lawmawm a tih thu a sawi a ni.

Pi Mimi Lalrinngheti, Manager, UD&PA, Khawzawl chuan fai intihsiakna atana Khawzawl town hmalak dan leh inbuatsaih dan tlangpui a tarlang a. DC office, KVK Khawzawl, VC, YMA leh MHIP ten theihtawp an chhuahpui vanga lawmman dawng thei an nih thu a sawi bawk.

Vawiina programme-ah hian DC Office-a officer te, KVK Head of Office bakah Khawzawl-a political party aiawhte, Village Council leh NGO aiawhte an tel a. Joint VC, Khawzawl, Sub-Headquarters YMA leh Sub-Headquarters MHIP aiawhte pawhin thu an sawi bawk a ni.