No.7424/2020-2021

New Delhi a cham mek Tourism Minister Pu Robert Romawia Royte chuan Central sawrkar hotuliante dawrin Tourism Ministry hotute chuan vawiin khan Assistance to Central Agencies Scheme hnuaiah Aizawl Convention Centre sakna tur cheng nuaih 4899 an lo hlan a, vawiin atanga chhiara ni 5 chhungin 1st Instalment rawn pek hman an in rin thu an lo hrilh bawk a, hna hi sum hmuh veleha thawh tan tur a ni.

Vawiin vek khan Sports Minister chuan Union Sports Minister Kiren Rijiju hmuin sports leh thalaite hmasawnna tur tam tak an sawi dun a. Union Minister hian Sports Minister sawm angin Kolasib Saidan venga Football Astroturf ground sak zawh thar chu a hawng dawn nghe nghe a ni.

Minister hian Union Sports Secretary Ravi Mittal pawh kawmin Tata Trusts ten sum mamawh zat an neih daihloh avangin Zoram High Altitude Training Centre rawtna awm mek chu a a kalzel hlei thei lo tih a hrilh a, sum cheng nuaih 1500 tal thawh ve tura ngenin, Union Secretary chuan Tata Trusts lamin cheng nuaih 1500 an thawh theih phawt chuan cheng nuaih 1500 dang chu NSD Fund atanga a sanction tur thu Minister hi a hrilh a, Lengpui Astroturf ground atana 2nd instalment pawh a release nghal tur thu alo hrilh bawk a ni. Aizawl Indoor Stadium sakna sanction an pekin a daihloh avanga Minister in sum a dil belh pawh pek a nih tur thu a lo hrilh a ni.

Sports Minister hian CM leh PWD Minister ni bawk Pu Zoramthanga chah angin MoRTH Addl Secretary pawh a tlawh a, Tripura nena inkalpawhna tha siam zawh nana hmabak Chhimluang to Vanghmun atana pawisa sanction tifel rang turin a ngen a ni.

Sports Minister hian nimin lamah Mumbai World Trade Centre ah Tata Trusts CEO Pu N.Srinath leh Officers dangte a kawm a, Mizorama football zirna hmun 60 dinte, Tata CoE tawp ta tha zawka bul tan thar dan turte an sawiho a, Zoram HATC pawh Central sorkar phutchhuaka sak ngei an duh tlang bawk a ni.