4494/2024-2025

Khawzawl, dated 28th February 2025: Vawiin khan District Civil Supplies Office Khawzawl leh District Legal Services Authority Champhai te tangkawp buatsaihin Khawzawl Vengthar YMA Hall ah “Legal Awareness Campaign on Lok Adalat for Consumer Complaint” neih a ni.

Vawiin awareness campaign-ah hian kalkhawmte chu Khawzawl DCSO, Pu CC Sakhawliana chuan consumer te tana hriat tur pawimawh hrang hrangte, an dikna chanvo te leh an mawhphurhna te inhrilhhriatna hun a nei a, consumer an nih anga harsatna an tawh theih hrang hrangte leh chung harsatna leh lungawilohna thlenna tur District Consumer Dispute Redressal Commission chu District tinah a awm thu te, hengah te hian ziaka complaint hi thehluh theih reng a nih thu te a sawi a, hemi atan hian DCSO Office chu an inhawn reng thu te a sawi bawk a ni.

He programme-a resource person atana sawm Pu V. Vanlalhriata, Chief Judicial Magistrate, Champhai chuan kalkhawmte chu dan zawm kawngah theihtawp chhuah turin a fuih a, thubuai hlabuai an neihte chu ngawihbo pui mai lovin a thlenna tur dik takah thlen tur a nih thu te, District Consumer Dispute Redressal Commission-a kal kher lovin man chawi lovin Lok Adalat-ah thlen theih reng a nih thu te a sawi. CJM chuan hmeichhia leh naupang te chunga hleihlenna a pun nasat thu te, Social Media hman sual kawngah hmeichhia leh naupangte chu a tuartu ber an nih thu te, dan chuan an dikna chanvo a humhalh tlat thute leh heng thila manchhuaha awm te chu an chungah hremna na taka lak thin anih thute a sawi a, kalkhawmte chu hetiang kawngah hian theihtawpa fimkhur theuh turin a chah a ni.