4495/2024-2025

28th February 2025: Lok Sabha MP Pu Richard Vanlalhmangaiha chuan vawiin khan Vairengte College Building sakna tur lungphum a phum.

MP Pu Richard Vanlalhmangaiha chuan inlungrual leh thahnemngai taka zirna sang college an neih theihna tura Vairengte All NGO te, All Party, sorkar hnathawkte leh khawchhung mipui te hmalakna chu fakawm a ti a. Zirna lam ngai pawimawha ke an pen dan chu entawntlak tiin, college building sakna tura an bultanna chu a chhunzawm zel na tur pawh sorkar laipuiah a remchan theihna hrang hrang dapin hma a lakpui tur thu a sawi a ni.

Khuallian chuan College din a nih hian a Building ah ringawt a tawk zo lo a, a thawktu tur Zirtirtu, hnathawk te leh Staff tam tak a ngaih bakah amah leh amah inchawm a intungnung thei tura thlirna thui tak neih tel a tul thu a sawi bawk.

College building lungphum phumna pual inkhawm hi Pu H. Vanlalbiakzaua, SDO (C), Vairengte chuan kaihhruaiin, Pu Z Lalremliana, Asst. Secy, Governing Body Vairengte College hnen atangin Technical Report ngaihthlak a ni. Building sakna tur hi khawtlang sum tuak hmanga a sak hna bultan tum a ni.