4496/2024-2025
Dated the 28th February, 2025 : Vawiin khan Mizoram Science, Technology & Innovation Council (MISTIC) buatsaihin National Science Day 2025 lawmna hun Synod Conference Centre, Mission Veng-ah neih a ni a. He hun hi Prof. Lalnundanga, Registrar, Mizoram University chuan Khuallian niin a hmanpui.
Khuallian Prof. Lalnundanga chuan zirlaite chu fuihin science chu subject har tak ni lovin uluk leh taima taka zir ngai a nih zawk thu a hrilh a. Keimahni theuha thiamna leh remhriatna te ngaihtuah chhuak thiam tura in zir turin a fuihin, India sorkar hnuaiah zirlaite puihna scheme hrang hrang a tam thu sawiin, zirlai kalkhawmte chu hmang tangkaia bawhzui turin a hrilh. Zirtirtu lo kalte pawh zirlaite tana remchanna siamsaka, hamthatna hrang hrangte haichhuahpui turin a chah bawk. Hei bakah hian MISTIC ten zirlaite Science-a an tui chhoh zel nana an hmalakna te chhunzawm zel tur in a fuih a ni.
He programme hi Er. H. Lalsawmliana, Chief Scientific Officer leh Member Secretary, MISTIC-in a kaihruai a, National Science Day lo pianchhuah dante leh programme neih dan tlangpui sawi hawnna neiin, kal khawmte lawmna hun a nei bawk a.
Dr. Davy Lalruatliana, Senior Scientific Officer leh Coordinator, chuan National Science Day denchhena programme hrang hrang Mizorama neih dan report a pe a. India ram pumpuiah National Science Day puala programme hi hman mek niin kumin atangin hemi puala programme hrang hrang neih chu India state tinah in ang veka duan a nih thu a sawi a, a lawmna hun pui ber chu Vigyan Bhawan, New Delhi ah neih niin, Prime Minister Pu Narendra Modi-a’n a hmanpui a ni.
He programme-ah hian National Science Day puala intihsiakna hrang hrang: 3rd State Level Science Competition te, Poster Making Competition te leh Video Making Competition lawmman semna hun hman a ni a. A titha zual hnenah sum fai leh chawimawina certificate hlan a ni.
National Science Day 2025 pualin Dr. Lalchhandami Tochhawng, Scientific Officer hnen atangin thupui ‘Empowering Indian Youth for Global Leadership in Science & Innovation for Vikshit Bharat’ tih presentation ngaihthlak a ni a, kalkhawm ten an hlawkpui hle a ni.
National Science Day lawmna pual hian Exhibition buatsaih niin, Mizo thalai Innovator ten an thil siamchhuahte pho chhuakin kal khawmte tan sawi fiahna leh sawihona te neih a ni a, mipuiin an hlut hle a ni.
He ni lawmnaah hian sikul zirlaite, college leh university zirlaite, Science NGO hrang hrang te, Science Institution hrang hrangte bakah Science lama tui sawmbik dangte an tel a, Pu Samuel Lalmalsawma, Principal Scientific Officer, MISTIC chuan lawmthu sawiin hun a khar a ni.
