4712/2024-2025

Khawzawl, dated 19th March 2025: Vawiin khan Khawzawl Sub-Headquarters YMA, Science and  Environment Committee rawtna bawhzuiin DC Meeting Hall-ah DC Pu K. Vanlathiana hovin lui hnar hrang hrangte khauh zawka humhalh dan tur sawi ho a meeting neih a ni.

Meeting kaihruaitu Pu Vanlalthiana chuan Pu PC Rosiama, President, Sub-Head Quarters YMA chu vawiina meeting an neih chhan te sawifiah turin a sawm a. Pu PC Rosiama chuan Khawzawl Sub-Hqrs YMA Executive Committee Meeting-in, Khawzawl Sub-Hqrs YMA huam chhunga lui hnarte chu humhalh tura hmalak ni se tia a lo rel chu hma laa bawhzui turin Science & Environment Committee kutah a dah a, chak taka hma laka tihhlawhtlin a nih ngei theihna turin Science & Environment Committee Meeting chuan hmalakna hmasa atan Tuichang lui hnar humhalh a nih theih nan Tuichang lui hnara ram neitute leh a kaihhnawih Department hotute chu hmalak dan tur sawi ho pui tura meeting ko an nih thu a sawi a ni. Hemi hnu hian tuihna humhalh kawnga hmalak a nih theih dan turte sawi hovin rawtna hrang hrang sawi hoa ngaihthlak a ni bawk.

DC Pu K Vanlalthiana chuan kan tu leh fate, kan thlah kal zel turte tan tuihna tha tak kan siamsak a tul a ni a ti a. Department mawhphurhna la turte chu theihtawp chhuaha hma la turin a sawm a, an hnathawhte chu hun bi neia enpuia a hmasawn dante an enpui leh tur thu a sawi. YMA leh VC-te chu a theih dan dan a hma lakpui turin a sawm bawk a ni.

Vawiin meeting-ah hian Khawzawl Joint V/C, Tualpui V/C leh Ngaizawl V/C aiawhte bakah hemi kaihhnawih Department hotute an tel a ni.