488/2025-2026

Khawzawl, dated 20th May 2025: Vawiin chawhma dar 11 khan DC Conference Hall-ah Wednesday, 21st May a 2nd IR Batallion thuthmuna mock drill neih tur atan District Disaster Management Authority (DDMA) chuan table top exercise an nei a, DDMA Chairman leh Khawzawl Bawrhsap ni bawk Pu K. Vanlalthiana'n hun a kaihruai.

Mock drill hi Civil Defence Plan enchhinna atana neih a ni a, 2nd IR Batallion-ah van atanga bomb thlak (air raid) anga chan a ni ang. Incident commander leh observer hrang hrang an awm dawn a, DC Office hi staging area a hman a ni ang. He hunah hian mock drill kalpui dan tur kimchang taka sawi ho a ni a, department hrang hrang chanvo te, a tel tur hrang hrang chet kual dan tur te, hmun hrang hranga tihtur leh awm dan tur te, siren rik dan tur te leh mipui hriattir dan tur chungchang te sawi ho a ni. Chairman Pu K. Vanlalthiana chuan department hrang hrang bakah mipui zirtirna tha tak a ni tih sawiin mahni chanvo theuh te tha taka hlen chhuak turin member te a chah a, mipui leh thawktute'n chhiatna a thlen palh thua an inzirna tha tak a nih ngei a beisei thu a sawi bawk.

He hunah hian Khawzawl SP Pu F. Lalbiakzauva, DC Office a officer te, 2nd IR Batallion hotute, District Hospital hotute, P&E hotute leh PHE hotute bakah YMA Sub-Headquarters hruaitute an tel a ni.