489/2025-2026

Dated Kolasib the 20th May 2025: Tukin khan Kolasib DC Circuit House ah Sawrkar laipui ina TB umbo a tumna beihpui thlakna pawimawh tak 100 days Campaign, Nikshay Shivir hawnna program neih a ni a. Pu Lalfamkima, Deputy Speaker, Mizoram Legislative Assembly chuan khuallian niin he hun hi a hmanpui a, Nikshay Shivir Campaign lirthei vailiamna hun a hmang nghal a ni.

He hunah hian Khuallian, Deputy Speaker Mizoram chuan thu sawiin, TB chu a damdawi an hmuhchhuah hma kha chuan tihdam theih loh natna ni thin in natna tihbaiawm tak a ni a, amaherawhchu a damdawi an hmuhchhuah tak hnu erawh chuan natna enkawl dam theih , mahse inkaichhawn erawh la awlsam tak si a ni thung a ni, a ti a. Kan Mizo society ah a huhova thil ti chi kannih avangin TB leh natna dang pawh mi pakhatin a vei chuan a dang tan veina chance a tam em em thu sawiin, fimkhur kan mamawh takzet a ni, a ti. TB veilo tur chuan mahni taksa tih chak a tih hrisel a pawimawh em em a ni tiin insawizawi leh ei leh in hrisel tak kan ei thin a pawimawh a ni, a ti a. TB vei mek te pawh in damdawi full course a an ei ngei a pawimawh a ni tiin an course te kim taka la tura chah in , an rilru pawh an tih paukhauh a pawimawh takzet a ni, a ti. Sawrkar hmalakna chu mipuiten thlawp a, mahni theihna zawn theuh a TB a lo tlem theih nana hma la theuh turin kalkhawmte chu a sawm nghal bawk.

Deputy Speaker chuan sawrkar in mipuite hriselna a ngaih pawimawh em em thu sawiin, tuna Mizoram universal healthcare scheme te pawh mitinin kan in register a pawimawh takzet a ni, a ti a. Mizoram mai nilo, ram pawn thlenga an refer dan a zira inenkawlna a awm theih dawn avangin mi harsa tak tak ten an chhawr tangkai lehzual hle dawn a ni, a ti.

Dr RK Lalthlamuana, Sr CMO, Kolasib District chuan vawiin hun hi kaihruaiin, TB umbo nana sawrkar hmalaknate leh Kolasib District ngei pawh a hma an lo lak tawh dan te a tarlang a.

Kolasibah TB vei an tam hle thu sawiin, kumin January to Aprl chhung ah ringawt pawh vei thar 70 vel hmuchhuak a ni, a ti. TB umbo hna, ni 100 campaign chu ngawrh taka hman tum niin, Kolasib District a khaw awm te fan chhuah vek an tum thu a sawi.

Pu Lalmalsawma fanai, District TBM Co Ordinator in report pe in, nikum December atang khan ni 100 campaign chu  India ram a High Priority Districts 347 ah bul tan a nih thu a sawi a. 

Mizoramah District pali ah kalpui tawh niin, Serchhip, Aizawl, Mamit leh Champhai ah te lo kalpui tawh a ni, a ti. Kolasiba kalpui an tum dan sawiin, thuang hnih a kalpui tur niin, Kolasib khaw chhung leh pawn ah kalpui a ni anga, khaw pawn lamah hian Hand held Xray hman tum a ni a, naktuk ah Phaisen atang bul an tan tur thu a tarlang bawk. 

Vawiin hunah hian TB chungchanga hmalakna te tarlan a nih bakah TB champion leh Nikshay Mitra donor te hnenah lawmman pek an ni a. Program hi Deputy Speaker bakah District a sawrkar official te leh Health Department a thawktute leh khawtlang ,NGO leh zirlai sawmbik zirlai ten an chhim a. Dr Ramdinthari , District TB Officer in lawmthu sawina a neih hnuin vawiin hun hi tihtawp a ni.