490/2025-2026

Siaha the 20th May 2025: Vawiin chawhma dar 11 khan DC Mini Conference Hall, Siaha-ah District AIDS Prevention and Control Committee (DAPCC) te chu an Chairman Pu VL Hruaizela Khiangte, District Bawrhsap ni bawk kaihhruainain thutkhawmna an nei a, he thutkhawmah hian State AIDS Control Society (MSACS) Project Director Pi Jane R Ralte leh a thawhpuiten an telpui a, Siaha District chhunga AIDS dinhmun leh a tih rem dan tur te, Kum 2024-2025 chhunga DAPCC hnathawh hrang hrang an sawiho a ni.

Thutkhawm kaihruaitu Pu VL Hruaizela Khiangte chuan Siaha chu India ram leh Mizoram pum anga thlir pawhin HIV/AIDS hluarna dinhmun hauh mektu a ni chu a runthlak hle a ti a, Ram leh thalai tichhe mektu ruihhlo do leh HIV/AIDS tih rem chu Health Dept leh MSACS kutah ringawt dah lova, NGO, Kohhran leh khawtlang tanrual a tul takzet, a ti. Thalaite leh naupang zawkte zinga HIV/AIDS chungchang awareness pek chu mitin mawhphurhna a ni a, rilru thar nen fim taka hmalan pana kal zel dan tur ngaihtuah a tul hle a ti a ni.

Pi Jane R Ralte Project Director, MSACS pawhin thu sawiin vawiin meeting chuan rawtna tha tak a hrinchhuah ngei a beisei a ti a, khawtlang leh kohhran ten tha taka an thawhpui thinnaah lawmthu a sawi bawk. Mizorama HIV/AIDS hluar zel chu Mizoram Mipui harsatna a ni a, Prevalence rate ah a sang fal nalh te chu ngaihpawimawh a tul takzet a ti. Khawtlang hruaitute chu Mipat hmeichhiatna hman fimkhur a tul thu leh hriau intawm a pawi zia tlangaupui turin a sawm a, condom sem kawngah pawh an thawhhopuina a ngen bawk. Mipui nawlpui zingah nasa lehzuala HIV hrik test a pawimawh thu te sawiin Mipui zirtirna kawngah theihtawp chhuahpui turin a ngen a ni.

Dr R Lalrengpuii, District AIDS Control Officer (DACO), Dy CMO ni bawk chuan District AIDS dinhmun tlangpui tarlanna a nei a, Cluster Programme Manager Pu Beingiachhie Lapi, pawhin Financial Year 2024-2025 chhunga DACPP activities hrang hrang tarlannna a nei bawk.

Vawiin thutkhawm chuan Siaha khawchhunga HIV/AIDS hluar zia leh tihremna atana khawtlang leh Pawl hrang hranga anga tan lak a tul thu te sawiho a ni. Report in a tarlan danin 2024-25 FY khan Siaha District chhunga sample 2203 endik zingah 155 lai HIV natna hrik hmuhchhuah a ni a, Hei hi za zelah 7.04 a ni. Raipuar hmeichhia 952 endik zingah 7 ah HIV hrik hi hmuhchhuah niin hei hi za zelah 0.74 a ni. NACO in a buatsaih HIV Estimation Data ah Siaha District chu Priority list ah a awm mek a, HIV hrik inkaichhawn tamna ber chu hriau (syringe) inhman tawm niin hei hi za zelah 71.6 lai a ni. Mipat hmeichhiatna atanga kai hi 41 an awm a, hei hi za zelah 26.45 a ni thung. MSACS chuan Syringe exchange programme an neih te, Condom sem te leh awareness an pek thin te chu mipui in an ngaihven a, tha taka an zawm theuh theih nan kalkhawmte chu tanrualpuiah an sawm nghal a ni.

He hunah hian DC Pu VL Hruaizela Khiangte, Sr CMO Dr Lalnunziri, DRDO PD Pu M Misael, DMS Dr Lalrosanga, District AIDS control Officer Dr R Lalrengpuii, Pi Hepaw Hlychho CDPO, te bakah ART centre Siaha aiawhte, ICTC, DSRC & SSK aiawhte, leh District Resource Person, LWS te an tel a ni. ‎