491/2025-2026

Aizawl 20.05.2025: Vawiin chhun khan State Hub for Empowerment of Women (SHEW), Women & Child Development (WCD) bultumin HSLC leh HSSLC Exam 2025 a Top 10-a tling hmeichhe naupangte hnena lawmpuina pekna hun Lianchhiari Run, I&PR Office–ah buatsaih a ni. Social Welfare, Women & Child Development (SWWCD) Minister Pi Lalrinpuii chu khuallian a ni.

Khuallian chuan zirlaite fuihna thu sawiin, an kal zelnaah midangte nun tidanglam thei tura zirna thiltihtheihna tilangtu ni turin a chah a. Tuna an hlawhtlinna chan hi a bul tanna mai a ni tih hre reng chunga hlawhtlinna tam zawk leh dinhmun sang zawk la luah chho tur chuan tha thlah lova rinawm taka beih tang tang a tul thu a sawi a. Minister Pi Lalrinpuii chuan hmeichhia nih avanga indahhniam mai emaw, thiltih harsat bik riau tura inngaihna nei mai lo turin zirlai kalkhawmte chu a chah a. Hetihrual hian tunlai kan Mizoram khawtlangah mipa in hma an sawn a pawimawh hle thu sawi bawkin Minister chuan mipa rintlak leh innghahtlakna an tlem tawh thu a sawi a. Mipa fa enkawl danah nu leh pa in tan an lak a tul thu a sawi.

Khuallian chuan zirlai hmeichhia tithate hnenah chuan chawimawina thilpek hlan in, thilpek hian pawisa fai bakah Certificate a keng tel a ni. HSLC ah hian Top 10-a tling hi an vaiin mi 24 an ni a, hmeichhia Sawm (10) an awm a, HSSLC ah hian Arts ah Top 10-ah mi 16 langin 9 te chu hmeichhia an ni a, Science ah mi 15 langin hmeichhia 6 leh Commerce ah chuan Top 10-a lang mi sawm (10) zinga 5 chu hmeichhia an ni a, Top 10-a hmeichhe naupang lang hi HSLC leh HSSLC ah an vaiin Sawmthum (30) an awm a ni.

Hmeichhe naupang, Zirna lam leh Sports lam thiam bikte chawimawina hun hi Beti Bachao Beti Padhao (BBBP) Scheme kaltlangin, kumtin neih thin a ni. BBBP Scheme in a tum ber chu Save the Girl Child, Educate the Girl Child tih a ni a, Mizo Tawng chuan Hmeichhe naupang chhanhim la, zirtirna tha pe rawh, tihna a ni.

Vawiin programme ah hian Pi Zonunthari, Joint Secretary, SWWCD chuan Chairman niin kalkhawmte lawmna thu a sawi a. Pi Zoramthangi Chhangte, Director WCD chuan Award chungchang sawi hawnna a nei bawk a ni. Pi Zonunpari Sailo, Joint Director, WCD chuan lawmthu sawina neiin hun hi a khar ta a ni.