1515/2025-2026

Khawzawl, dated 19th September 2025: Tukin khan District Hospital, Khawzawlah Indian Medical Association bultumin Multi Speciality Clinic hawn a ni a, Khawzawl Bawrhsap Pu K. Vanlalthiana chu khuallian niin Swasth Nari, Sashakt Parivar Abhiyan a hawng nghal bawk a ni.

Khuallian Pu K. Vanlalthiana chuan IMA doctor te'n he hun ropui tak Khawzawl district-a an buatsaih avangin lawmthu a hrilh a, clinic buatsaihnaa sum leh pai, tha leh zung senga rim taka thawkte hnenah lawmthu a sawi bawk. Prime Minister zahawm tak Pu Narendra Modi piancham vawi 75-na pualin Swasth Nari, Sashakt Parivar Abhiyan chu September ni 17 atanga October ni 2 thleng India ram puma neih tur a nih angin Khawzawlah pawh hman a ni dawn tih a sawi a, hmeichhia leh naupangte hriselna atana hmasawnna a nih ngei a rin tlat thu a sawi. He clinic hian mipuite tan damna leh hriselna a thlen ngei a beisei thu a sawi a, Swasth Nari, Sashakt Parivar Abhiyan hi a hawng nghal bawk a ni.

Multi Speciality Clinic hawnna hun hi IMA Project & Programme Wing Convener, Dr. Lalhmuchhuaka'n a kaihruai a, doctor te hmelhriattirna hun a nei a ni.

Hawnna hun hman zawh hian doctor te'n damlo an en tan a, hmun hrang hrang atangin doctor 54 an lo kal a, hmun hrang hrang - Synod Hospital te, sawrkar hospital te, private hospital te - atanga lo kal an ni. Thiamna hrang hrang department 15 an lo kal a, Champhai leh Lunglei doctor te an tel a ni. He hunah hian doctor te'n damlo an chawh tur damdawi an lo keng a, heng man hi Tuichang bialtu MLA Pu W. Chhuanawma'n a tumsak a, a bak senso IMA, MGDA, Civil Hospital, ZFDA leh mimal thahnem ngaiten an thawhkhawm a ni. Ultrasound, endoscopy khawl te rawn kengin, blood test leh biopsy te pawh a thlawna tih a ni. MSACS lamin HIV & STI Screening an nei bawk.

Dar 2 thleng khan hming ziak 4,010 an awm a, doctor te'm hming ziak an en zat chu 2,729 a ni. Department hrang hrang dar 2 thlenga damlo an en dan chu hetiang hi a ni:

1. Surgery OPD: 208
2. Chest medicine OPD: 90
3. Medicine OPD: 377
4. Cardiology OPD: 123
5. Nephrology OPD: 100
6. Dental OPD: 117
7. Paediatrics OPD: 141
8. Orthodontics OPD: 225
9. ENT OPD: 291
10. Endoscopy OPD: 41
11. Ultrasound OPD: 176
12. Obs. & Gynae OPD: 232
13. Psychiatry OPD: 46
14. Eye OPD: 322
15. Skin OPD: 240

Doctor te hian damlo hi hmingziak an awm chhung chu an en zel dawn a, hei aia tam hi an en tura ngaih a ni.

Swasth Nari, Sashakt Parivar Abhiyan in a tum chu nu ho in preventive, promotive leh curative health service an dawn ve theih nana tih a ni a, a bik takin heng service in a la hmaih ho te zawn chhuah theih nan a duan a ni. District hospital, CHC, PHC leh Health & wellness centre-ah te specialist ten nu/hmeichhia te a bika service hrang hrang, specialist te atanga a dawn ve theih nan a ruahhman a ni.