No.7323/2020-2021

Vawiin chawhma dar 11:00 khan Zuchhip YMA Hall, Khawzawlah National Voters’ Day (NVD) vawi 11 na hman a ni. He hun hi  Pu Zothanmawia, Deputy Commissioner, District Election Officer ni bawk chuan Khuallian niin a hmanpuia, voter thar thlanchhuah mi sawm (10) hnenah EPIC leh Badge a semchhuak. BLO thawk tha ber Pu David Zohmangaiha, Chawngtlai II BLO hnenah chawimawina thuziak leh pawisafai a hlan bawk.

Khawzawl District Election Officer chuan Covid-19 hrileng laka kan himna tura sawrkar thuchhuahte fimkhur taka zawm chungin, inthlan chungchanga voter-te chanvo, mawhphurhna leh hriat tur pawimawhte hrechianga, 'Informed voter' ni thei tura tan la theuh tur leh, Election kaihhnawih dan bawhchhiatna an hmuh leh hriatte chu thuneitute hnena thlen zel turin Khawzawl District mipuite a sawm a. ECI siam Mobile Application  hrang hrang  Voter Helpline, cVIGIL, PwD leh a dangte tangkai taka kan hman phawt chuan mahni thutlukna ngei hmanga vote thlak thei, kan mamawh leh ngaihpawimawh zawngte sawrkar hriata phochhuak thei 'Empowered Voter' ni turin min pui thei dawn ani, a ti bawk.

Vawiina National Voters’ Day hmanna-ah hian Pu James Lalnithanga, SDO(S), 22-Tuichang (ST) Assembly Constituency ERO ni bawk chuan National Voters' Day thutiam sawirualna hun a kaihruai a. Dr. Saithangpuia, BDO/AERO in Chief Election Commissioner thuchah Mizotawnga lehlin a chhiarchhuak bawk a ni.

Hun kaihruaitu Pu H. Lalramenga, SDC/Election Officer chuan Khawzawl District Election Branch huaihawta National Voters’ Day hmasa ber hman a ni chu ni chhinchhiahtlak tlak tak anih thu a sawi a. Election chungchanga hriattur pawimawhte inzirtira, voter-te hriatna tizau tura duan Systematic Voters’ Education and Electoral Participation program (SVEEP) chu Khawzawl District-ah uar zawka kalpui tum a ni tih sawiin, School leh College te kal pangngaia an kal theih hunah Electoral Literacy Club (ELC) te pawh din tum a ni tih a tarlang.  National Voters’ Day puala Election Commission of India in a tlangzarh, online a Voter ID download theihna ‘e-EPIC’ chungchang presentation a pe bawk. 

Zuchhip YMA Hall-a National Voters’ Day lawmna hunah hian Khawzawl town chhunga BLO te bakah voter thar thlanchhuah te, Village Council, Political Party leh NGO aiawhte bakah Khawzawla MJA member-te an tel a ni. 

National Voters’ Day-ah hian Khawzawl District chhunga BLO ten an bialchhungah theuh voter tharte hnena EPIC semchhuah leh Pledge chhiar rualin hun an hmang a. Chanchinbu leh video clip hmangtea National Voters’ Day leh e-EPIC chungchang thehdarh niin, Khawzawl hmun lun laiah NVD poster tar a ni a. Sawrkar Office hrang hrangah te NVD Pledge chhiarchhuahna hun hman a ni bawk.