2152/2026-2027 

Dated Khawzawl, the 10th September, 2026 : Vawiin khan Khawzawl Bawrhsap Pu K. Vanlalthiana kaihhruaiin DC Conference Hall-ah Khawzawl District chhunga Barak luipui finkhawmtu lui hrang hrang leh a chhehvel ram (catchment area) humhalh leh siamthat beihpui thlakna ‘Conservation & Restoration of Catchment Areas of Barak River in the States of Assam, Manipur, Mizoram and Nagaland’ project chungchang sawiho a ni.

Pu Rajkhungur Basumatary, SR. Manager, North Eastern Region Community Resource Management Society (NERCORMS) chuan he project chungchang power point presentation hmangin a sawifiah a. He project hi sawrkar laipui leh KfW, Germany fund tur niin, North Eastern Council hnuaiah kalpui a ni a (implementing agency), NERCORMS-in hna an thawk dawn a ni (executing agency). Mizoram chhung District 8, Aizawl, Champhai, Mamit, Lunglei, Serchhip, Kolasib, Saitual leh Khawzawlah te project hi kalpui a ni ang.

Barak lui dung hi leilung hman sual a tam avang te, lui finkhawmtu watershed area enkawl uluk a nih tawk loh avang te leh luipui dung enkawlna kawnga thawhhona tha a awm tawk loh avang tein tuilian, leimin leh harsatna dangte a thlen nasat phah a. He project kaltlang hian ramngaw, nungcha leh tui hna humhalh hna te, kuthnathawktu leh lo neitute eizawnna tihchangtlun kawngah te hmalak tum a ni.

Vawiin thutkhawmah line department hrang hrang hotute chu hemi project atana data pawimawh lakhawm tura tih an ni a. October 12-16, 2026 chhungin NERCORMS official ten Mizoram an lo tlawh leh dawn a, hemi hun chhung hian Khawzawl District chhunga catchment area te a hmunah enfiahin sawrkar hotute nen thutkhawm leh a ni ang.