2153/2026-2027 

Dated Khawzawl, the 10th September,2026 : Vawiin khan Fisheries Department, Khawzawl District leh ICAR - CIFA( Center for Inland Freshwater Aquaculture) Bhubaneswar, Odisha tangkawpin sangha vulhtute hmasawnna tur leh ei zawnna tihchangtlung nan sangha chi tha (Amur Carp) semna hun chu District Fisheries Development Office, Khawzawlah hman a ni a. He hun hi Khawzawl Bawrhsap Pu K. Vanlalthiana chuan a hmanpui.

Bawrhsap Pu K. Vanlalthiana thu sawiin, sangha khawitute sangha tharchhuah tihpun nana mithiamte hmalakna chu fakawm a tih thu a sawi a. He hmalakna hi chhungkua leh khawtlang innghahna tlaka sangha vulh hna tihhmasawn nan a pawimawh hle tih sawiin, kalkhawmte chu taimak chhuaha hmang tangkai ngei turin a fuih a ni.

District Fisheries Development Officer (DFDO) Pi Zomuansangi chuan technical report tawi pein, sangha chi thar Amur carp semte hi ram hmasawnna atana thil tangkai tak a nih ngei a beisei thu a sawi a. ICAR-CIFA te nen thawhhona tha tak an neih thu sawiin, North East region a hma latu, Principal Scientist Dr. Subhendu Adhikari leh a team-te chungah lawmthu a sawi bawk.

He hma lakna hnuaiah hian Khawzawl District khaw hrang hrangah a zau thei ang berin, sangha khawitu mi taima leh ti tak tak mi 100 thlanchhuahte hnenah sangha chi tha hi sem chhuah a ni a. Sangha chi sem chhuahte hi an than chak bik bakah natna lakah an fihlim bik hle tura ngaih a ni.