2154/2026-2027

Aizawl the 10th September, 2026: “Ruihhlo leh Zuin kan hnam a run a, chhungkua min tichhia a. Hemi do tur hian chhung tin kan tan rual a ngai a ni”, Art & Culture Minister Pu C.Lalsawivunga’n a ti. He thu hi ama office chamber, MINECO-a Pu TC Vanlalzauva siam “Who are you going to be? (Eng mi nge i la nih dawn?” tih film a tlangzarhnaa a sawi a ni.

Kum 1983 khan Mizo film hmasa ber tihchhuah a ni a, tun hun thlirin Mizo film industry a thang nasa hle a ni, Minister chuan a ti a. Film lama thawktu zawng zawngte chungah lawmthu sawiin duhsakna a hlan a ni. Ruihhlo hluar lutuk chungchang sawi zawmin Pu C.Lalsawivunga chuan "Kan hnam kal zel tur hian ven a mamawh ta em em a, chutiang laka chhungkaw tin min zirtir thei tur leh Mizo nunzia phawkchhuak thei film thar a lo awm leh ta hi lawmawm ka ti a, Zofate tan hlawk taka thawk turin ka beisei tlat a ni," a ti.

Khualzahawm Pu Lalawmpuia Khiangte, Sr.Vice, Chairman, Mizoram Film Forum pawhin thu sawiin, Mizo film Industry chu khawvel hmun hrang hranga awm Zofate phuarkhawmtu a ni, a ti a. Mizo film industry bul tan dan leh Bollywood lam thlenga an luh tawh dante a sawi bawk.

Pu TC Vanlalzauva film siam, vawiina Minister-in a tlangzarh takah hian Mizoramin a buaipui leh manganpui - ruihhlo hrang hrang avanga Zofate rumna tarlan a ni a. Ruihhlo laka thalaite him nan kohhran leh mi tinte mawhphurhna lam hawi tarlan a ni bawk.

Tribal Research Institute (TRI), Art & Culture Department chuan he film siamna senso hi a tum a ni.

Film siamtu T.C.Vanlalzauva hian kum 1997 atang khan film siam lam hi buaipuiin Mizo film hriat hlawh tak tak a lo siam tawh a. Doordarshan lamah a documentary film siamte tihchhuah thin a ni bawk. A film siam tam tak chu India rama film festival hrang hrangah tihchhuah an lo ni tawh bawk a ni.

Film tlangzarh inkhawm hi Rosila Tlanthianghlimi'n kaihruaiin, Art & Culture Department Director, Pi Carol V.L.M.S.Dawngkimi leh Offical thahnem tak telin film mi thahnem tak an tel a. Orientation Media film neitu Pu T.C.Vanlalzauva chuan lawmthu sawina hun hmangin film lama inhmang hranghlui mi 11 hnenah chawimawina a hlan nghal a ni.