4690/2024-2025

Khawzawl, dated 18th March 2025: Ni 2 chhung awh tur 19th Mizoram Open Taekwondo Championship 2025 chu vawiin khan Khawzawl Vengthar YMA Hall-ah tan a ni a, Khawzawl DC Pu K. Vanlalthiana chuan khuallian niin Championship hi a hawng a ni.

Khawzawl District Amateur Taekwondo Association President Pu K. Lalhmangaihzauva chuan hawnna hun a kaihruai a, khuallian DC Pu K. Vanlalthiana chuan thu sawiin Khawzawlah 19th Mizoram Open Taekwondo Championship 2025 nghah a ni chu lawmawm a tih thu leh Championship-ah Mizoram chhung hmun hrang hrang atanga inkhel mi thahnem tak an tel thei chu lawmawm a tih thu a sawi a, Championship a tel zawng zawng te duhsakna a hlan nghal a ni.

19th Mizoram Open Taekwondo Championship 2025-ah hian Mizoram a Taekwondo Players tha leh lar taktak te an rawn kal a, Khawzawl khaw pawn atangin Players 150 vel rawn telin khawchhung atangin Players 50 vel an tel thei a ni. He competition hi Khawzawl District Amateur Taekwondo Association leh Mizoram Amateur Taekwondo Association bultum a ni.