2234/2026-2027 

Dated Khawzawl, the 16th September, 2026 : Vawiin khan Pluck & Pay Organising Committee chu Khawzawl Deputy Commissioner Pu K. Vanlalthiana kaihhruaiin DC Office Video Conference Hall-ah Pluck and Pay Festival neih tura inpuahchahna thlirho-in an thukhawm.

Vawiin thutkhawmah hian sawrkar department hrang hrangte, Dikson Event Management leh Tualte leh Chawngtlai Village Level Organising Committee te hnen atangin an inpuahchah dan ngaihthlak a ni a. Festival hawnna inkhawm program kimchang taka duan a ni a, a kharna hun hman dan tur rel fel a ni bawk.

Pluck and Pay Festival hi September 23-25, 2026 chhung neih tur a ni a, a hawnna inkhawm hi Tualte ah neih tur niin, Chawngtlai-ah a kharna hun hman a ni dawn a ni. He festival hi tourism tihhmasawnna kawnga khawtlang nena tanrual (community-based tourism) lama hmalakna niin, a thlengtu khuaten hlawkpui ber se tih hi sawrkar duh dan a ni a.

Festival-ah hian mipuiten a thlengtu khuaa lo leh huanah te kalin, thlai leh theite mahni a lovin an lei theih dawn a. Hei bakah hian mikhualte tana intihhlima tur Mizo infiamna chi hrang hrang buatsaih a ni dawn a, heng hmun pawimawh, Nikuala Lungdawh te, Pasaltha Hranghleia thlan te, Zo Hill Station te leh adangte a duh apiang tan a tlawh theih dawn bawk a ni. Festival-ah hian kuthnathawktute thar chhuah leh siam chhuah thil chi hrang hrang zawrhna tur stall engemawzat siam a ni dawn a. A hawnni leh kharni-ah hian zaithiam lar tak takte hovin concert buatsaih a ni dawn a ni.