2963/2024-2025

Khawzawl, dated 13th November, 2024: Vawiin chawhnu dar 1:00 p.m khan DC Meeting Hall-ah central sawrkar scheme thar, Dharti Aaba Janjatiya Gram Utkarsh Abhiyan (PM DAJGUA) chungchangah meeting neih a ni a, DC Pu K. Vanlalthiana chu chairman niin hun a kaihruai.

Meeting-ah hian DAJGUA chungchang sawihawnna nei turin Pu Suvigya S. Chandra, IAS, SDO (Sadar) chuan PowerPoint presentation a pe a, he scheme thil tum te, department leh office hrang hrang buaipui tur te, scheme kalpui dan tur leh hmachhawp te a tarlang a ni. Presentation zawh hian district level a he scheme kalpui dan tur thukhawm te'n an sawi ho a, DAJGUA launch programme bakah Eklayva Model Residential School (EMRS) lungphum phum tur chungchang rel ho a ni bawk. DAJGUA hnuaia IEC chungchang rel ho a ni bawk a, hoarding, poster leh social media hmanga thehdarh dan tur te rel a ni. Chairman Pu K. Vanlalthiana chuan meeting tel tura lo kal khawm te hnenah lawmthu a sawi a, DAJGUA scheme a hlawhtlin a mipuiin an hlawkpui ngei theih nan chanvo nei te'n tha taka an hna te hlen turin a fuih bawk a ni.

He hunah hian Pu Lalfakzuala, Addl. DC; Pu Timothy R. Lalhmangaiha, BDO; Sr. EE (PHED), DEO, DFDO, DAH&VO te leh Medical Officer te an tel a ni.

DAJGUA scheme hi Prime Minister Shri Naredra Modi khan October ni 2, 2024 khan a tlangzarh a, Scheduled Tribe tamna khaw hrang hranga scheme hrang hrang kalpui nana umbrella scheme a ni. He scheme denchhen hian Khawzawl Darngawn ramah EMRS school hawn a ni dawn a, video conference hmangin Prime Minister Shri Naredra Modi chuan DC Meeting Hall-ah lungphum a phum dawn a ni.