2964/2024-2025

Dated Lawngtlai, 13th November, 2024 : Vawiin chawhnu dar 1:30  khan Lawngtlai District Agricultural Marketing Committee (DAMC) chuan an Chairman leh District bawrhsap nibawk Pu Cheemala Siva Gopal Reddy, IAS, kaihruaiin DC Conference Hall- ah thutkhawm an nei.

Pu Cheemala Siva Gopal Reddy, IAS, chuan DAMC Member lo kalte hnena lawmthu sawina a nei hmasa a. Mizoram sawrkarin  Bâna Kaih (Handholding Policy) a kalpui mekah Huan/ Lo neituten hlawkna tak tak an neihna turin DAMC in a tih tur ang angte ti a hma a lak mek thu a tarlang a. DAMC hmalakna a Thlai thar zawrhna tura market mumal leh fel fai zawk a awm ngei a beisei awm thu a sawi. Pu Cheemala Siva Gopal Reddy chuan Lawngtlai District chhunga Sawhthing, Aieng, Hmarcha leh Hmunphiah chingtuten hlawk leh man man zawka an hralh chhuah theihna tura theihtawp chhuah chhunzawm zel turin DAMC Member- te a sawm nghal bawk.

Vawiin thutkhawmah hian  Lawngtai District - a Rural Development Block Pali-te tana Primary leh Secondary Collection Centre tura tih te chu enho a ni a. Primary Collection Centre hi khawtinten an mamawh danin lo in din se tiin,  Secondary Collection Centre- tura khua thlanchhuahte chu pawm nghalin, Mizoram Agricultural Marketing Board (MAMB) hnenah pawmpui tura thlen thuai ni se an ti a. Buyer - Seller Meet chungchangah 'registration' tih mek a nih thu tarlan niin, a hma thei ang bera neih tura hmalak nise an ti bawk. Thlai thar lakkhawmna Secondary Collection Centre-  tura  thlante chu a hnuaiah hian tarlan a ni.

Lawngtlai RD Block
Secondary Collection Centre- Lawngtlai ( Horticulture Rural Godown) Council Veng, Diltlang ( Community Hall)
Sangau RD Block
Secondary Collection Centre- Sangau (Sangau-II Hall), Siachangkawn ( Playground)
Bungtlang South RD Block
Secondary Collection Centre- Bungtlang South (Community Hall)
Chawngte RD Block
Secondary Collection Centre- Barapansuri

Vawiin Lawngtlai District Agricultural Marketing Committee (DAMC) thutkhawmah hian Member leh Line department an tel kim tha hle a, Pu Cheemala Siva Gopal Reddy, IAS, Chairman, DAMC chuan lawmthu sawina neiin hun a khar.