4373/2024-2025

Khawzawl, dated 21st February 2025: Vawiin chawhnu dar 1 khan DC Meeting Hall-ah Prime Minister's Employment Generation Programme (PMEGP) hnuaia District Level Monitoring Committee (DLMC) an thukhawm a, chairman leh Khawzawl DC ni bawk Pu K. Vanlalthiana'n a kaihruai a ni.

Chairman Pu K. Vanlalthiana chuan meeting sawi hawng turin KVIC lam atangin Pu Safiyan Hayath a sawm a, ani hian PMEGP hnuaia hming ziak an tlem thu a sawi a, tam zawk an inziah theih nana hmalak dan tur sawi ho a tul thu a sawi. Bank manager te hnen atangin an harsatna tawh te ngaihthlak a ni a, PMEGP a hming thehlut an awm mang lo tih te an sawi. Diltu an tam theih nan KVIB Champhai Branch leh Khawzawl Village Council te thawhhonain mipuiin harsatna an tawh chhan te finfiah ni se tiin thutkhawmnaah chuan an rawt a, mipuiin an hriat zau theih nan social media te, lehkha tar te, hoarding te leh awareness programme hmangin hma lak ni se tih an rel bawk.

Chairman Pu K. Vanlalthiana chuan PMEGP hi mipui te eizawnna siam thei tha tak a nihna angin a hlawhtlin a ngaih pawimawh em em thu a sawi a, diltu a tam thei ang ber an awm theih nana theihtawp chhuah turin member te a sawm a ni.

He hunah hian Addl. DC Pu Lalfakzuala, SDO (Sadar) Pu Suvigya S. Chandra, IAS, Champhai SBI LDM Pu Lawmkima, Champhai KVIB Dy. CEO Pu Rodinsanga Renthlei, KVIC aiawh dang te leh bank manager te an tel a ni.

Meeting zawh hian DC Conference Hall-ah mipui leh Village Council te tan PMEGP Awareness Camp buatsaih nghal a ni a, Pu Safiyan Hayath chuan a kaihruai a ni.